पोखरा – नवनिर्वाचित सांसद महावीर पुनले आफ्नो पुस्तक बिक्रीबाट हालसम्म करिब १२ करोड रुपैयाँ संकलन गरेका छन् । उक्त रकम वीरगञ्जमा सञ्चालन गर्न लागिएको कृषि औजार कारखानाका लागि प्रयोग गरिने उनले बताएका छन् ।

सामाजिक सञ्जालमा लेख्दै उनले आज बिहान १० बजेदेखि बेलुकी ७ बजेसम्म पोखराका तीन स्थानमा मात्रै १४०८ वटा पुस्तक बिक्री भएको जानकारी दिएका छन् । पुस्तक बिक्रीबाट संकलित सम्पूर्ण रकम वीरगञ्जस्थित कृषि औजार कारखाना सञ्चालनका लागि प्रयोग हुने उनले उल्लेख गरेका छन् ।

उनका अनुसार कारखानामा साना किसानलाई आवश्यक पर्ने विभिन्न प्रकारका कृषि औजार उत्पादन भइरहेको छ। ती औजारहरू के–कस्ता बन्दैछन् भन्नेबारे फुर्सद मिल्ने बित्तिकै भिडियोमार्फत सार्वजनिक गर्ने पनि उनले बताएका छन्।

पुनले कारखाना सञ्चालनका लागि कम्तीमा २० करोड रुपैयाँ आवश्यक पर्ने उल्लेख गर्दै पुस्तक बिक्री अभियान अझै जारी रहने बताएका छन् ।