नयाँदिल्ली- मध्यपूर्वमा जारी युद्धका बीच व्यापारिक पानी जहाजमाथि भएका आक्रमणमा दुईजना भारतीय नागरिकको मृत्यु भएको छ । यो आक्रमणमा परेका अझै एकजना बेपत्ता छन्।

भारतीय विदेश मन्त्रालयका प्रवक्ता रणधीर जायसवालले बुधबार यसबारे जानकारी दिएका हुन्।

खाडी क्षेत्रमा रहेका भारतीय नागरिकको सुरक्षा र कल्याणका लागि भारत सरकार प्रतिबद्ध रहेको उनलले बताए । त्यहाँको अवस्थाबारे नजिकबाट निगरानी गरिरहेको पनि उनले जानकारी दिए ।

उता हर्मुज जलक्षेत्रमा मेरिकी र इजरायली जहाजमाथिको आक्रमणलाई इरानले ‘वैध लक्ष्य’ को संज्ञा दिएको छ।

इरानको सेनाले हर्मुज स्ट्रेट हुँदै जाने अमेरिका, इजरायल वा उनीहरूको सहयोगी देशका जहाजहरूलाई निशाना बनाउन सकिने चेतावनी दिएको छ।

इरानको सैन्य केन्द्रीय अपरेसन कमान्ड खातम अल-अनबिया ले सरकारी टेलिभिजनमार्फत जारी गरेको वक्तव्यमा ‘अमेरिका, सियोनिस्ट शासन वा उनीहरूको सहयोगी देशसँग सम्बन्धित तेल बोकेको जहाज वा जहाज आफैँलाई वैध लक्ष्य मानिने’ भनिएको छ।

इरानी सेनाले हर्मुज स्ट्रेटहरूबाट एक लिटर तेलसमेत पार हुन नदिने चेतावनी दोहोर्‍याइरहेको छ।