काठमाडौं- हर्मुज जलडमरूमध्यमा थाई मालवाहक जहाजमाथि हमला भएको छ । संयुक्त अरब इमिरेट्स यूएईको खालिफा बन्दरगाहबाट भारतको काण्डलातर्फ जाँदै गरेको थाइल्याण्डमा दर्ता भएको ‘मयुरी नारी’ नामक मालवाहक जहाजमाथि हर्मुज जलडमरूमध्यमा भीषण आक्रमण भएको हो ।

थाइल्याण्डको शाही नौसेनाले सार्वजनिक गरेका तस्बिरमा जहाजको मुख्य भाग र माथिल्लो संचरनाबाट बाक्लो कालो धुवाँको मुस्लो निस्किएको देखिन्छ भने समुद्रमा जीवनरक्षक डुङ्गाहरू (लाइफ राफ्ट) तैरिरहेका छन् । १७८ मिटर लामो र ३० हजार टन क्षमताको उक्त जहाजमाथि भएको आक्रमणको ठोस कारण र विस्तृत विवरण भने अझै खुल्न सकेको छैन ।

यसबारे हाल अनुसन्धान भइरहेको थाई नौसेनाले जनाएको छ । यस संकटपूर्ण घडीमा ओमानको नौसेनाले तत्काल सक्रियता देखाउँदै जहाजमा सवार २० जना नाविकहरूको सकुशल उद्धार गरेको जनाइएको छ । बाँकी तीन जना चालक दलका सदस्यहरूको खोजी तथा उद्धारका लागि अहिले तीव्र प्रयासहरू भइरहेका छन् ।

जहाज ट्र्याकिङ गर्ने वेबसाइटहरूका अनुसार यो जहाज ओमानको तट नजिकै हर्मुज जलडमरूमध्यमा अत्यन्तै सुस्त गतिमा चलिरहेको देखिएको छ । पछिल्लो समय इरानले आफ्ना तेल निर्यात गर्ने छिमेकी मुलुकहरूमाथि आक्रमण सुरु गरेसँगै यस क्षेत्रमा व्यापारिक जहाजहरूको सुरक्षामा गम्भीर चुनौती थपिएको छ ।

रणनीतिक रूपमा महत्त्वपूर्ण मानिने यस सामुद्रिक मार्गमा भएको पछिल्लो आक्रमणले अन्तर्राष्ट्रिय व्यापारिक समुदायमा त्रास फैलाएको छ । यसबाट विश्वव्यापी ऊर्जा अर्थतन्त्रलाई समेत संकटमा धकेलिएको छ ।

संयुक्त अधिराज्य बेलायतको सामुद्रिक व्यापार सञ्चालन केन्द्रले बुधबार खाडी क्षेत्रमा तीन वटा व्यापारिक जहाजहरूमाथि हमला भएको जानकारी दिएको थियो । तर यो घटना ती तीनमध्येकै एक हो वा छुट्टै हो भन्ने विषयमा अझै स्पष्ट हुन सकेको छैन । बैंककस्थित ‘प्रिसियस शिपिङ’ कम्पनीको स्वामित्वमा रहेको यस जहाजको विषयमा कम्पनीले अहिलेसम्म कुनै आधिकारिक प्रतिक्रिया दिएको छैन ।