दुबई- अमेरिका र इजरायलले इरानमाथि युद्ध थोपेरको असर समग्र खाडी देशहरूमा परेको छ। इरानविरुद्धको युद्ध २ दिनमा टुंग्याउने जिकिरसहित हमला गरेका अमेरिकी राष्ट्रपति डोनाल्ड ट्रम्प र इजरायली प्रधानमन्त्री बेन्जामिन नेतन्यायहू अहिले संकटमा छन् ।

युद्ध लम्बिँदै ११ औँ दिनमा पुगिसकेपछि खाडी राष्टहरूमा सम्भावित आणविक विपत्तिले पिरोलेको छ। अमेरिकाले तेहरामा आणविक हतियार प्रयोग गर्ने चर्चाबीच खाडी देशले त्यसबाट जोगिन तयारी सुरू गरेका छन्।

यही कारण बहराइनको एक एजेन्सीले भारतको चण्डीगढस्थित एक औषधि कम्पनीसँग सम्पर्क गरेर आणविक प्रतिरोधि सामान मागेको हो ।

एजेन्सीले कम्पनीसँग आणविक आपतकालमा प्रयोग हुने ‘प्रुशियन ब्लू’ क्याप्सुल ठूलो मात्रामा उत्पादन गर्न सकिने नसकिने अवस्थाबारे सोधेको छ। जानकारीअनुसार करिब १ करोड क्याप्सुल उत्पादन गर्ने क्षमता भए नभएको जानकारी उसले भारतीय कम्पनीसँँग मागेको हो ।

यसका साथै विभिन्न उमेर समूहका मानिसलाई यसको कति मात्रा दिनुपर्छ भन्नेबारे जानकारी पनि उक्त एजेन्सीले मागेको छ।

यो औषधिले शरीरमा पुगेका रेडियोएक्टिभ (रेडिएसनयुक्त) तत्वहरूको प्रभाव कम गर्न मद्दत गर्छ। यस्ता तत्व शरीरमा पुगेमा यस क्याप्सुलले तिनीहरूलाई आन्द्रामा बाँधेर दिसामार्फत बाहिर निकाल्न सहयोग गर्छ।

पहिले यो औषधि मुख्यतः अमेरिका र युरोपमा उत्पादन हुन्थ्यो । तर भारतमा यसको व्यावसायिक उत्पादन करिब दुई वर्षअघि मात्रै सुरु भएको हो।