मुम्बई – आईसीसी टी–२० विश्वकप २०२६ अन्तर्गत मुम्बईको वानखेडे स्टेडियममा जारी खेलमा वेस्ट इन्डिजले इंग्ल्यान्डलाई १९७ रनको लक्ष्य दिएको छ ।

टस जितेर पहिले बलिङ रोजेको इंग्ल्यान्डविरुद्ध वेस्ट इन्डिजले निर्धारित २० ओभरमा ६ विकेट गुमाउँदै १९६ रन बनाएको हो ।

वेस्ट इन्डिजका लागि शेरफन रदरफोर्डले उत्कृष्ट ब्याटिङ गर्दै ४२ बलमा अविजित ७६ रनको इनिङ खेले । उनले २ चौका र ७ छक्का प्रहार गर्दै टोलीलाई प्रतिस्पर्धी स्कोरमा पुर्‍याएका थिए। त्यसैगरी जेसन होल्डरले १७ बलमा ३३ रन जोडे भने रोस्टन चेजले ३४ रनको योगदान दिए ।

इंग्ल्यान्डका बलर आदिल राशिदले २ विकेट लिएसँगै ऐतिहासिक उपलब्धि हासिल गरेका छन् । राशिद प्रतियोगितामा इंग्ल्यान्डका लागि सर्वाधिक विकेट लिने बलर बन्नुका साथै टी–२० क्रिकेटमा ४०० विकेट पूरा गर्ने कीर्तिमान बनाउन सफल भए ।

यसअघि इंग्ल्यान्डले आफ्नो पहिलो खेलमा नेपाललाई ४ रनले पराजित गरेको थियो भने वेस्ट इन्डिजले स्कटल्यान्डलाई ३५ रनले हराएको थियो ।