काठमाडौं- भारतले हिन्द महासागरमा अवस्थित मुलुक सेचेल्सका लागि १७ करोड ५० लाख अमेरिकी डलर बराबरको विकास सहायता प्रदान गर्ने भएको छ ।

सेचेल्सका राष्ट्रपति प्याट्रिक हेर्मिनीसँगको भेटवार्तापछि भारतीय प्रधानमन्त्री नरेन्द्र मोदीले सहायताको घोषणा गरेका हुन् ।

यो सहायता सेचेल्सको समुद्री क्षेत्रमा लक्षित हुने र यसबाट दुई देशबीचको विकास साझदारी थप मजबुत हुने अपेक्षा गरिएको छ । दुई नेताबीचको भेटवार्ताका क्रममा विभिन्न सात सम्झौतामा हस्ताक्षर समेत भएको छ ।

दुई देशले डिजिटल प्रविधिको विकास, निर्यात, डेटा साझेदारी र समुद्री क्षेत्रको वैज्ञानिक अनुसन्धानमा जोड दिएका छन् ।

यसबाहेक दुई देशका नेताबीच दिगो साझेदारी, व्यापार, अर्थतन्त्र र सुरक्षाबारे पनि छलफल भएको भारतीय समाचार संस्था पीटीआईले जनाएको छ ।

छ दिने भ्रमणका लागि सेचेल्सका राष्ट्रपति भारतमा छन् ।