काठमाडौं- आईसीसी पुरुष विश्वकप लिग–२ अन्तर्गत क्यानडा विरुद्धको खेलमा नेपालले छैठौँ सफलता पाएको छ । नेपालका ललीत राजवंशीले इनिङ्सको ३४ ओभर ३ बलमा क्यानाडाका श्रेयस मोभ्भालाई आउट गरे ।

ललीतको बलमा श्रेयस कट बिहाइन्ड भए । आउट हुनुअघि उनले ३४ बलमा २६ रन बनाए । यस क्रममा उनले १ चौका र १ छक्का प्रहार गरे ।

हालसम्म नेपालका ललीत र कप्तान सन्दीप लामिछानेले समान दुई र करण केसीले एक विकेट लिएका छन् ।

यसअघि ओमनको अल अमिरात क्रिकेट मैदानमा टस हारेर पहिले ब्याटिङ गरेको नेपालले पूर्वकप्तान रोहित पौडेलको शतकको मद्दतमा पूरै ५० ओभर खेल्दै सबै विकेट गुमाएर २३५ रन बनाएको थियो ।

नेपालले शृंखलामा क्यानडा र ओमानसँग दुई–दुई खेल खेल्नेछ । लिग–२ को शीर्ष चार टोलीले सन् २०२७ मा हुने एक दिवसीय विश्वकप छनोट प्रतियोगितामा स्थान बनाउने छन् ।

लिग–२ को अन्तिम चार खेलमा आइपुग्दा नेपाल अंक तालिकाको सातौँ स्थानमा छ । नेपालले ३२ खेलबाट २४ अंक जोडेको छ । यस्तै, क्यानडाले ३३ खेलबाट २५, ओमानले २९ खेलबाट ३३ अंक बनाएका छन् ।

यसैगरी, नामिबिया ३५ खेलबाट ३१, यूएईले ३१ खेलबाट १९ अंक जोडेका छन् । अमेरिकाले ३४ खेलबाट ४७ अंक बनाएर च्याम्पियन बन्दा स्कटल्याण्डको ३६ खेलबाट ४५ र नेदरल्याण्ड्सको ३२ खेलबाट ३८ अंक छ ।