काठमाडौँ– अभिनेत्री रेखा थापा अभिनीत फिल्म ‘३६ को आँकडा’को गीत ‘बहुलाउँछु कि क्या हो ?’ सार्वजनिक भएको छ । घटस्थापनाको अवसर पारेर फिल्मको गीत सार्वजनिक गरिएको रेखा थापाले जानकारी दिइन्।

गीतमा अञ्जु पन्त र सत्यराज आचार्यको स्वर रहेको छ । गीतका शब्द गीतकार सुरेश अधिकारीले लेखेका हुन् ।

रेखा फिल्म्सको ब्यानरमा निर्माण भएको फिल्ममा काइट्स इन्टरटेनमेन्ट सहनिर्माताका रूपमा रहेको छ । पारिवारिक कथामा आधारित फिल्ममा रेखा थापा मुख्य भूमिकामा देखिँदै छिन्। उनीसँगै पूजा शर्मा, निरुता सिंह, पुष्प खड्का र महेश त्रिपाठीलगायत कलाकारले अभिनय गरेका छन्।

सबिर श्रेष्ठको निर्देशनमा बनेको फिल्मले पारिवारिक सम्बन्ध र त्यससँग जोडिएका कथालाई पर्दामा प्रस्तुत गर्नेछ। फिल्मको प्रदर्शन मिति मंसिर १७ गतेलाई तय गरिएको छ।