काठमाडौं– बुढीगण्डकी नदीमा आएको बाढीका कारण चार वटा जलविद्युत आयोजनाहरूमा भौतिक क्षति पुगेको प्रारम्भिक विवरण प्राप्त भएको छ । 

बाढीले जलविद्युत आयोजनाका मुख्य क्याम्प क्षेत्र, बेलिब्रिज, पहुँच सडक तथा निर्माण उपकरण र सामाग्रीहरू बगाएको र क्षति पुर्‍याएको स्वतन्त्र ऊर्जा उत्पादकहरूको संस्था, नेपाल(इप्पान)ले जनाएको हो ।

टाइम्स इनर्जी प्रालि प्रवर्धक रहेको ३४१ मेगावाट क्षमताको बुढीगण्डकी जलविद्युत आयोजनाको मुख्य क्याम्प क्षेत्र र केही निर्माण उपकरणहरू बाढीले बगाएको छ । 

त्यसैगरी, दोभान खोला हाइड्रोपावर लिमिटेडद्वारा प्रवर्द्धित २४.५ मेगावाटको दोभान खोला जलविद्युत आयोजनाको क्याम्प क्षेत्रका केही घरहरूमा क्षति पुग्नुका साथै बेलिब्रिज बाढीले बगाएको इप्पानले जनाएको छ ।

यस्तै, यारु हाइड्रो पावर प्रवर्धक रहेको ३०.५९ मेगावाट क्षमताको यारु खोला जलविद्युत आयोजनाको बेलिब्रिजमा क्षति पुगेको छ भने निर्माण सामाग्री तथा उपकरणहरू बाढीले बगाएको छ । 

वाटर इनर्जी डेभलपमेन्ट प्रवर्धक रहेको १६ मेगावाट क्षमताको माछा खोला जलविद्युत आयोजनाको भने पहुँच सडक र आयोजना स्थलसम्म पुग्ने पुलमा क्षति पुगेको छ।