काठमाडौं– बिहीबार उद्योग, वाणिज्य तथा आपूर्ति मन्त्री गौरीकुमारी यादवले राजीनामा दिइन् । उनले ग्यासको आपूर्तिमा कर्मचारीले असहयोग गरेको र व्यवसायीलाई ‘पाता फर्काउनुपर्ने’ विवादास्पद अभिव्यक्ति दिँदा भएको चौतर्फी विरोधपछि राजीनामा दिएकी हुन् । यादव उद्योगमन्त्रीमा आसिन हुँदादेखि नै मुलुकमा ग्यासको अभावको सुरुवात भइसकेको थियो ।

भन्सार विभागको तथ्यांकले भने पछिल्ला महिनाहरूमा नेपालमा विगतको तुलनामा ग्यासको आपूर्तिमा वृद्धि हुँदै आएको देखाएको छ । तर, पूर्वमन्त्री यादवले समस्यालाई समाधान गर्ने हिसाबले भूमिका भने प्रदर्शन गर्न सकिनन् ।

बरु उल्टै आफ्नै कर्मचारी र व्यवसायी आक्रोशित हुनेगरी अभिव्यक्ति दिँदा उनले मन्त्री पदबाट नै राजीनामा दिने अवस्थाको सिर्जना भयो । तर, पूर्व मन्त्री यादवले राजीनामा दिएको दिनदेखि नै सरकारले अगाडि बढाएको अनुसन्धान तथा एक्सनले भने व्यवसायीले ग्यासको बिक्री प्रक्रियामा ठूलो छलछाम गरिरहेको हुनसक्ने आशंका पैदा गरेको छ ।

शुक्रबार मात्रै एक हजार बढी सिलिण्डर बरामद शुक्रबार उपत्यका अपराध अनुसन्धान कार्यालयको टालीले काठमाडौं महानगरपालिका–३२ नरेफाँट र सामाखुशीको ग्यास बिक्रेताबाट लुकाइ राखेको ३७२ थाना ग्यास सिलिण्डर बरामद गर्‍यो । प्रहरीले नरेफाँटस्थित रामेछाप ब्राण्ड ग्यास डिलरका सञ्चालक र बसुन्धारास्थित हाम्रो सगरमाथा सहकारी संस्थामार्फत ग्यासको कारोबार गर्दै आएका व्यक्तिलाई पक्राउ पनि गर्‍यो ।

प्रहरीले शुक्रबार नै तीनकुनेस्थित गैरीगाउँबाट दुई वटा ट्रकमा लोड गरि राखिएको अवस्थामा ७ सय वटा सिलिण्डर बरामद गरेको छ । ग्यास कालोबजारी गरेको आरोपमा वसुन्धारास्थित जय श्री बालाजी ग्यास स्टोरका सञ्चालकलाई पक्राउ पनि गरेको छ ।

स्तै, उद्योग, वाणिज्य तथा आपूर्ति विभागले उपभोक्ताबाट अस्वभाविक बढी मूल्य असुल्ने र मिलेमतोमा ग्यास बिक्री गर्ने २ जना व्यवसायीलाई ६ लाख रुपैयाँ जरिवाना गरेको छ । शुक्रबार विभागको टोलीले कागेश्वरी मनोहरा–६ स्थित अनिल किराना पसल र ललितपुरको बालकुमारस्थित ग्यास पम्पलाई ३/३ लाख रुपैयाँ जरिवाना गरेको हो । बिहीबार पनि प्रहरीले भक्तपुरको सूर्यविनायकबाट ७५ थान र इटाछेबाट २८ सिलिण्डर ग्यास बरामद गरेको थियो ।

शुक्रबार नवनियुक्त उद्योग, वाणिज्य तथा आपूर्ति मन्त्री दीपक साहले ग्यास उद्योग सहज बनाउने सम्बन्धमा उद्योगीहरूसँग छलफल पनि अगाडि बढाएका छन् । उनले शुक्रबार मन्त्रीको सपथ लिएलगत्तै उपभोक्ताले ग्यास पाउनुपर्ने बताएका थिए ।

प्रहरी र विभागले अनुसन्धान र कारबाही अघि बढाएसँगै ग्यास बिक्रेता महासंघले पनि उपभोक्तालाई अनावश्यक मूल्य नलिन व्यवसायीलाई आग्रह गर्दै विज्ञप्ति प्रकाशन गरेको छ । साथै, महासंघले विज्ञप्तिमार्फत सरकारले तोकेको बिक्री मूल्यभन्दा बढीमा ग्यास बिक्री गरी अनुचित लाभ लिने जोसुकैलाई कानुनी कारबाहीको दायरमा ल्याउन माग गरेको छ ।