काठमाडौं- नेपाली कांग्रेसका नेता डा. शेखर कोइराला संस्थापन इतर समूहले आयोजना गर्ने भनिएको राष्ट्रिय भेलामा सहभागी हुने भएका छन् ।

स्वकीय सचिव दिनेशचन्द्र थपलियाले यही साउन २९ गतेदेखि हुने इतर समूहको भेलामा नेता डा. कोइराला सहभागी हुने पुष्टि गरेका छन् ।

‘कांग्रेसका नेता डा. शेखर कोइराला साउन २९ गते आयोजना गरिएको भेलाको उद्घाटन समारोहमा सहभागी हुनुहुनेछ’, उनले मंगलबार भनेका छन्।

थपलियाका अनुसार उक्त भेला पार्टी विभाजनका लागि नगरिएको पनि स्पष्टीकरण गरेका छन् । ‘त्यो कुनै पनि पार्टी विभाजन गर्ने भेला होइन’, थपलियाले भने, ‘उक्त भेलामा सहभागी भएर डा. कोइरालाले पार्टी एकताकै लागि आव्हान गर्नुहुने छ ।’

उक्त भेलामा सहभागी हुन कांग्रेसका पूर्वसभापति शेरबहादुर देउवा पनि बिहीबार आउँदैछन् । गत चैतदेखि हङकङमा रहेका उनी शुक्रबार थाइल्यान्डको बैंकक पुगेका थिए ।

तर उनकी पत्नी एवम् पूर्वपरराष्ट्रमन्त्री एवम् कांग्रेस नेतृ डा. आरजु राणा देउवा र छोरा जयवीर देउवा नआउने भएका छन्। देउवा साउन २६ गते नै नेपाल आउने तयारीमा थिए ।

कांग्रेसको इतर पक्षले आगामी साउन २९ देखि ३१ गतेसम्म काठमाडौंमा राष्ट्रिय भेला आयोजना गरिएको छ।

सर्वोच्च अदालतले कांग्रेसको आधिकारिकतासम्बन्धी विवादलाई पुनरावलोकनमा लगेपछि इतर समूह उत्साहित छ । सर्वोच्चको उक्त निर्णयपछि उत्साहित इतर समूहले देउवासहितका शीर्ष नेतालाई राष्ट्रिय भेलामा उभ्याउन लागेको छ।

उक्त राष्ट्रिय भेलाको संयोजन नेता डा. शशांक कोइरालाले गर्दैछन् । तर उक्त भेलाबाट कांग्रेस औपचारिक रुपमा दुई चिरामा विभाजित हुने चिन्ता आमकार्यकर्तामा देखिएको छ।