काठमाडौँ – नेपाल क्रिकेट संघ (क्यान) का सचिव एवं पूर्वकप्तान पारस खड्काले राष्ट्रिय टोलीका निवर्तमान कप्तान रोहित पौडेलको नेतृत्व क्षमता र योगदानको उच्च प्रशंसा गरेका छन्।

रोहितको कप्तानी यात्रालाई लिएर सामाजिक सञ्जालमा प्रतिक्रिया दिँदै पारसले सिंगो देशको आशालाई आत्मसात् गर्दै गर्व, अदम्य साहस र दृढ संकल्पका साथ टोलीको नेतृत्व गरेकोमा धन्यवाद व्यक्त गरेका हुन्।

“अत्यन्तै चुनौतीपूर्ण समयमा पनि तिमीले टोलीलाई अभूतपूर्व उचाइमा पुर्‍यायौँ,” पारसले लेखेका छन्, “मैदानभित्र र बाहिर एक सिङ्गो पुस्तालाई प्रेरित गर्न तिमी सफल भएका छौँ।”

पारसले कप्तानका रूपमा रोहितले हासिल गरेका उपलब्धि, उनको उत्कृष्ट नेतृत्व र उनले छाडेको विरासतप्रति आफूलाई गर्व लागेको बताएका छन्। साथै, कप्तानको जिम्मेवारीबाट अलग भए पनि नेपाली क्रिकेटलाई रोहितको योगदानको निरन्तर आवश्यकता रहने र उनले आगामी दिनमा पनि त्यसरी नै देशको नाम उच्च राख्ने विश्वास पारसले व्यक्त गरेका छन्।