काठमाडौं – नेपालले यसै वर्ष घरेलु मैदानमा भारत ‘ए’ टोलीसँग तीन खेलको टी–२० अन्तर्राष्ट्रिय श्रृंखला खेल्ने भएको छ ।

नेपाल क्रिकेट संघ (क्यान)का अनुसार श्रृंखलाका सबै खेल काठमाडौंस्थित त्रिभुवन विश्वविद्यालय (त्रिवि) क्रिकेट मैदानमा आयोजना हुनेछन् ।

यो श्रृंखला स्कटल्यान्डमा सम्पन्न आईसीसीको वार्षिक सम्मेलनका क्रममा नेपाल क्रिकेट संघ (क्यान)का अध्यक्ष चतुरबहादुर चन्द, सचिव पारस खड्का र भारतीय क्रिकेट नियन्त्रण बोर्ड (बीसीसीआई) का सचिव देवजित सैकियाबीच भएको भेटवार्ता तथा सहमतिपछि तय भएको हो ।

कार्यतालिकाअनुसार पहिलो खेल डिसेम्बर ९ मा, दोस्रो खेल डिसेम्बर ११ मा र तेस्रो तथा अन्तिम खेल डिसेम्बर १३ मा हुनेछ । भारत ‘ए’ जस्तो बलियो टोलीविरुद्ध घरेलु मैदानमा खेल्न पाउनु नेपाली टोलीका लागि ठूलो अवसर मानिएको छ ।

यसले नेपाली खेलाडीलाई उच्चस्तरीय प्रतिस्पर्धाको अनुभव दिलाउनुका साथै अन्तर्राष्ट्रिय स्तरको तयारीमा समेत महत्वपूर्ण योगदान पुग्ने अपेक्षा गरिएको छ । नेपाल र भारत ‘ए’ बीच पहिलोपटक हुन लागेको यो टी–२० श्रृंखलाप्रति नेपाली क्रिकेट समर्थकमाझ पनि ठूलो उत्साह देखिएको छ ।