काठमाडौँ – विश्वकपको क्वाटरफाइनलमा इंग्ल्यान्डसँगको भिडन्तअघि युरोपभर नर्वेको राष्ट्रिय फुटबल टोलीको जर्सी अभाव भएको छ । शनिबार हुने खेलअघि आधिकारिक बिक्रेतासँग नर्वेको जर्सी पूर्ण रूपमा ‘सोलड आउट’ भएको हो ।

नर्वेजियन फुटबल एसोसिएसन (एनएफएफ) ले जर्सीको मागलाई कम आकलन गर्दा यो समस्या आएको स्वीकारेको छ । गत मार्चमा बजारमा आएदेखि नै नाइकी लगायतका आउटलेटमा यो जर्सी निरन्तर अभाव रहँदै आएको थियो । स्टार स्ट्राइकर एर्लिङ हालान्ड जस्ता खेलाडीको बढ्दो क्रेज र विश्वकपमा नर्वेले ब्राजिललाई पराजित गरेपछि जर्सीको माग अत्यधिक बढेको हो । बजारमा नयाँ स्टक आउनासाथ पसलमा समर्थकको ओइरो लाग्ने गरेको छ भने कतिपय प्रशंसक जर्सी किन्न रातभर पाल टाँगेर बस्ने गरेका छन् ।

एनएफएफका व्यावसायिक निर्देशक रुनार पार आन्द्रेसेनका अनुसार यस वर्ष जर्सीको माग पूर्वानुमानभन्दा निकै बढी र कीर्तिमानी स्तरमा छ । गत वर्षको यसै अवधिमा करिब ५० हजार जर्सी अर्डर गरिएकोमा यस वर्ष बिक्रेताले करिब २ लाख ५० हजार जर्सी अर्डर गरेका थिए ।

ओस्लोस्थित तोर्शोभ स्पोर्ट्सले जर्सीको नयाँ स्टक प्राप्त गरेपछि बुधबार पसल खुल्नुअघि नै समर्थकको ६ सय मिटर लामो लाइन लागेको थियो । कतिपय समर्थकहरू कुर्सी लिएरै १२ घण्टासम्म लाइनमा बसेका थिए ।

स्टोरले अब अर्को स्टकका लागि नाम दर्ता सुरु गरे पनि शनिबारको खेलअघि जर्सी उपलब्ध गराउन सक्ने ग्यारेन्टी दिएको छैन।