काठमाडौं- पवित्र तीर्थयात्रा हज सम्पन्न गरी हजयात्रीहरूको टोली भारत फर्किएको छ । मक्काको काबा पुगेर सकुशल स्वदेश फर्कन पाएकोमा हजयात्रीहरूले निको खुसी व्यक्त गरेका छन् । उनीहरूले त्यहाँ लाखौँ मानिसका लागि गरिएको व्यवस्थापनको समेत उच्च प्रशंसा गरेका छन् ।

पवित्र यात्रा पूरा गरेर दिल्ली विमानस्थल आइपुगेका अहमद नामका एक हजयात्रीले अल्लाहको कृपाले आफ्नो यात्रा सहज भएको बताए । साउदी अरब सरकारले हजयात्रीहरूको सुरक्षा, स्वास्थ्य उपचार र आपतकालीन सेवाका लागि उत्कृष्ट प्रबन्ध मिलाएको भन्दै उनले खुसी व्यक्त गरे ।

आफ्ना परिवार र आफन्तलाई छाडेर यति टाढाको यात्रा गर्नु सहज नभए पनि त्यहाँको सरकारले उपलब्ध गराएको सुरक्षा, एम्बुलेन्स र चिकित्सक टोलीका कारण कसैले पनि कुनै समस्या भोग्नु नपरेको उनको भनाइ थियो । उनले आफू, आफ्नो परिवार र देशको समृद्धिका लागि प्रार्थना गरेको समेत जानकारी दिए ।

यसैबीच, उत्तर प्रदेशका मन्त्री दानिस आजाद अन्सारीले विमानस्थल पुगेर हजयात्रीहरूलाई भव्य स्वागत गरेका छन् । मन्त्री अन्सारीका अनुसार यस वर्ष उत्तर प्रदेशबाट १८ हजारभन्दा बढी र समग्र भारतबाट १ लाख २५ हजारभन्दा बढी तीर्थयात्री हजयात्रामा सहभागी भएका थिए । यो संख्या विश्वभरबाट हजमा जाने कुल यात्रीहरूको झन्डै १० प्रतिशत हो ।

हजयात्रीहरूको सहजता र सुरक्षाका लागि भारत सरकारले विशेष ध्यान दिएको भन्दै मन्त्री अन्सारीले प्रधानमन्त्री नरेन्द्र मोदी र मुख्यमन्त्री योगी आदित्यनाथप्रति आभार प्रकट गरे । हजयात्रीहरूले मक्का र मदिना लगायतका पवित्र स्थलहरूमा पूजापाठ गरी भारतमा शान्ति, प्रगति र भाइचाराको कामना गरेको उनले बताए । तीर्थयात्रीहरूलाई स्वागत गर्न विमानस्थलमा हजारौँ मानिसको उपस्थिति रहेको र यसले समाजमा आपसी सद्भाव, सम्मान र एकताको सन्देश दिएको मन्त्री अन्सारीको भनाइ छ ।