कास्की- नेपाली कांग्रेसका सभापति गगन थापाले पार्टीलाई एकताबद्ध बनाएर रिब्रान्डिङ गर्ने बताएका छन्।

पोखरामा आयोजित कार्यक्रमलाई सम्बोधन गर्दै थापाले यस्तो बताएका हुन् । ०८४ मा हुने स्थानीय तह र प्रदेशसभाको निर्वाचनमा कांग्रेसलाई पहिलो बनाउनेगरी रिब्रान्डिङ गरिने उनको दाबी छ ।

पार्टी सभापतिको हैसियतमा लचक हुँदै सबैलाई समेटेर कांग्रेसलाई एकताबद्ध बनाइने उनको भनाइ छ ।’सभापतिको जिम्मेवारीमा छु । सबैभन्दा लचक र सबैलाई मिसाउने कोसिस गर्छु । पार्टीलाई मिलाउनु छ । अधिवेशन गर्नुछ,’ उनले भने ।

एकताबद्ध पार्टीकै आधारमा कांग्रेसले स्थानीय र प्रादेशिक चुनावमा पहिलो स्थान हात पार्ने उनले बताए । ‘२०८४ सालमा हुने स्थानीय र प्रदेशको चुनावमा फेरि पहिलो पार्टी बनाउनेगरि हामीले २०८३ मा मेहनत गर्छौैँ, दुख गर्छौँ,’ उनले भने, ‘पार्टीलाई ठिक ठाउँमा लैजान सबैको साथ रहन्छ भन्ने विश्वास छ ।’

चुनावी परिणामका कारण कांग्रेस कमजोर वा रक्षात्मक हुन आवश्यक नरहेको बताए । उनले वैशाखभित्र क्रियाशील सदस्यता सम्बन्धित वडाबाटै अद्यावधिक गर्दै कांग्रेस आईडी लिन सबैलाई आग्रह गरेका छन् ।

वैशाखभित्र अद्यावधिक नगर्नेहरू महाधिवेशनमा समावेश नहुने उनले बताए । ‘वैशाखमा जति संख्यामा अद्यावधिक हुन्छ उहाँहरू नै महाधिवेशनमा सहभागी हुन पाउनुहुन्छ,’ उनले भने ।

पार्टीलाई एकताबद्ध बनाउन र नियमित महाधिवेशन सम्पन्न गराउनका निम्ति सबैको साथ हुने अपेक्षा थापाले राखेका छन् ।