काठमाडौं- पूर्वी चीनमा निर्माणाधीन रेलमार्गको पुल भत्किँदा ५ जनाको ज्यान गएको छ । पूर्वी चीनको जियाङ्शु प्रान्तस्थित यान्चेङमा घटना भएको हो ।

सो क्रममा ९५ मिटर अग्लो पुल भत्किएको थियो । दुर्घटनामा परी घाइते भएका दुई जनाको पछि मृत्यु भएको र हराइरहेका तीन जनालाई पनि मृत घोषित गरिएको छ ।

घटनामा पाँच जनाको ज्यान गएको स्थानीय अधिकारीले पुष्टि गरेका छन् । लियानयुङगान–शाङ्घाई रेलमार्गअन्तर्गत युएगाङ पुलको बिम भत्किएर दुर्घटना भएको चीनको राज्य सञ्चालित सिन्ह्वा सामाचार संस्थाले जनाएको छ ।

यो परियोजना चाइना रेलवे १२ औँ ब्यूरो ग्रुपले निर्माण गरिरहेको जनाइएको छ । चीनले पछिल्लो समय तीव्र गतिमा रेल सञ्जाल विस्तार गरिरहेको छ ।

लियानयुङगान–शाङ्घाई रेलमार्ग परियोजनाले उत्तरी जियाङ्शुलाई पूर्वी चीनको आर्थिक केन्द्रसँग जोड्ने लक्ष्य राखेको छ ।