दोलखा– दोलखाको वैतेश्वर गाउँपालिकाले आयोजना गरेको प्रथम वैतेश्वर गाउँपालिका वडास्तरीय शिक्षक–कर्मचारी भलिबल प्रतियोगिता शनिबारदेखि सुरु भएको छ । प्रतियोगिताको उद्घाटन वैतेश्वर गाउँपालिका अध्यक्ष छवि लामाले गरेका थिए । दुई दिनसम्म सञ्चालन हुने प्रतियोगिताको व्यवस्थापन वैतेश्वर माध्यमिक विद्यालयले गरिरहेको छ ।

कार्यक्रमको उद्घाटन गर्दै अध्यक्ष लामाले भलिबल प्रतियोगिताले राष्ट्रसेवक कर्मचारी र शिक्षकबीचको सम्बन्धलाई थप सकारात्मक तथा मजबुत बनाउने बताए ।

खेलाडी उत्पादन गर्ने मुख्य थलो नै विद्यालय भएकाले शिक्षकहरुलाई खेलकुद कार्यक्रममा जोडेर आफ्ना विद्यालयबाट विद्यार्थी खेलाडी उत्पादन गर्न टेवा पुगोस् भन्ने उद्देश्यले पनि शिक्षक–कर्मचारी भलिबल प्रतियोगिता आयोजना गरिएको पालिका उपाध्यक्ष कल्पना उप्रेतीले बताइन् ।

वैतेश्वर माध्यमिक विद्यालय व्यवस्थापन समितिका अध्यक्ष अशोक तामाङको अध्यक्षतामा उद्घाटन गरिएको प्रतियोगितामा वैतेश्वरका ८ वडा विद्यालयका ८ टिम रहेका छन् भने आयोजक गाउँपालिकाको २ वटा टिम छन् ।

खेल उद्घाटन कार्यक्रममा वैतेश्वर– १ का वडाअध्यक्ष भीमबहादुर तामाङ, ३ का वडाअध्यक्ष कमल अधिकारी, जिल्ला खेलकुद संघ दोलखाका अध्यक्ष आशिष तामाङ लगायतको उपस्थिति रहेको थियो ।