स्पेन- स्पेनमा आवास सङ्कटलाई लिएर विरोध प्रदर्शन चर्किरहेका बेला प्रधानमन्त्री पेड्रो सान्चेजले शनिबार मध्यावधि निर्वाचनका लागि चुनावी अभियान सुरु गरेका छन् ।

सन् २०२७ मा निर्धारित आमनिर्वाचनअघि नै निर्वाचन गराउने निर्णय गरेका सान्चेजले पुनः सत्ता नेतृत्वमा फर्किने प्रयास गरेका छन् । उनले नोभेम्बर २९ मा निर्वाचन गराउने घोषणा गरेका छन् ।

म्याड्रिडकी ८७ वर्षीया पेन्सनभोगी मारिकार्मेन अबास्कललाई दुई साताअघि घरबाट बेदखल गरिएको घटनापछि स्पेनमा आवाससम्बन्धी विरोध प्रदर्शन चर्किएको हो । देशको दीर्घकालीन आवास सङ्कटको प्रतीक बनेको उक्त घटनाले सरकारमाथि तत्काल कदम चाल्न दबाब बढाएको थियो ।

प्रधानमन्त्री सान्चेज नेतृत्वको अल्पमत सरकारले आवाससम्बन्धी प्रस्ताव संसद्बाट पारित गराउन नसकेपछि राजनीतिक दबाब थप बढेको थियो । त्यसपछि उनले मध्यावधि निर्वाचनको घोषणा गरेका हुन् ।

सन् २०१८ देखि सत्तामा रहेका सान्चेज अन्तर्राष्ट्रिय राजनीतिमा पनि चर्चित हुन्छन्। अमेरिकी राष्ट्रपति डोनाल्ड ट्रम्प र इजरायलसँगको उनको टकरावले विश्वका प्रगतिशील समूहको ध्यान आकर्षित गरेको छ । तर, स्पेनभित्र उहाँ विवादास्पद नेताका रूपमा चिनिन्छन् । विभिन्न सर्वेक्षणमा उनको दल मुख्य विपक्षी कन्जरभेटिभ पिपुल्स पार्टी (पीपी) भन्दा पछाडि देखिएको छ ।

शनिबार आयोजित चुनावी सभामा सान्चेजले आफ्नो दलले पूर्ण बहुमत प्राप्त गरेमा भाडावाललाई घरजग्गाको सट्टेबाजीबाट जोगाउने कानुन थप बलियो बनाउने प्रतिबद्धता जनाए ।

उनले आवासको न्यायपूर्ण व्यवस्थाका लागि अभियान चलाउने सबैको प्रयासको प्रशंसा गर्दै अबास्कलप्रति श्रद्धाञ्जली व्यक्त गरे। अबास्कलको बुधबार अस्पतालमा निधन भएको थियो ।

स्पेनमा बढ्दो घरभाडा र आवासको अभाव प्रमुख राजनीतिक मुद्दा बन्दै गएको छ । यसले आगामी निर्वाचनमा सान्चेज नेतृत्वको सरकारका लागि चुनौती थपेको छ ।