काठमाडौं– राष्ट्रपति रामचन्द्र पौडेलले बदलिँदो विश्व परिवेशअनुरूप शिक्षा प्रणालीलाई परिमार्जन गर्दै विद्यार्थीलाई भविष्यका चुनौती सामना गर्न र अवसरको सदुपयोग गर्न सक्षम बनाउनुपर्ने बताएका छन् ।

पशुपति मित्र माध्यमिक विद्यालयको ८०औँ वर्ष प्रवेशका अवसरमा आज आयोजित समारोहमा उनले विज्ञान, प्रविधि र कृत्रिम बौद्धिकता (एआई) को तीव्र विकाससँगै शिक्षा प्रणालीको स्वरूप पनि परिवर्तन भइरहेको बताए ।

राष्ट्रपति पौडेलले शिक्षा प्रणालीले विद्यार्थीलाई पाठ्यपुस्तकको ज्ञान र परीक्षामा उच्च अङ्क हासिल गर्ने क्षमतामा मात्र सीमित राख्न नहुनेमा जोड दिए । आजका विद्यार्थी नै भविष्यका शिक्षक, चिकित्सक, इन्जिनियर, प्रशासक, उद्यमी, राजनीतिज्ञ, वैज्ञानिक तथा जिम्मेवार नागरिक बन्ने भएकाले उनीहरूमा व्यावहारिक ज्ञान, नवीन सोच र समस्या समाधान गर्ने क्षमता विकास गर्नुपर्ने उनको भनाइ थियो ।

राष्ट्रको भविष्य निर्माण गर्ने आधार शैक्षिक प्रणाली भएकाले विद्यार्थीमा अनुशासन, इमानदारी, परिश्रम, सदाचार, देशप्रेम र सामाजिक उत्तरदायित्वजस्ता गुण विकास गर्नुपर्ने राष्ट्रपति पौडेलले बताए।

उनले राष्ट्रप्रतिको जिम्मेवारीबोध र सामाजिक सद्भावलाई शिक्षाको अभिन्न अङ्ग बनाउनुपर्नेमा जोड दिए । विद्यार्थीलाई प्रविधिको सदुपयोग गर्न र राष्ट्रप्रति जिम्मेवार बन्न प्रेरित गर्नुपर्ने उल्लेख गर्दै उनले यसका लागि सरकार, नीतिनिर्माता तथा शिक्षा क्षेत्रका सरोकारवाला सबै पक्षबीच सहकार्य आवश्यक रहेको बताए ।