काठमाडौँ– भारतका चर्चित राजनीतिक युट्युबर ध्रुव राठी पक्राउ परेका छन् । शनिबार बिहान उनलाई प्रहरीले गुरुग्रामको सेक्टर ५६ स्थित उनकै निवासबाट पक्राउ गरेको भारतीय सञ्चारमाध्यमले जनाएका छन् ।

उनलाई पक्राउ गर्न ५० जनाको हाराहारीमा प्रहरी पुगेको थियो । सुरक्षाकर्मीको टोलीले शुक्रबार बेलुकादेखि नै उनको निवासको निगरानी गरिरहेको थियो ।

जर्मनीमा बसोबास गर्ने उनी कक्रोच जनता पार्टीको प्रदर्शनमा सहभागी हुन भारत पुगेका छन् । निर्वाचन आयोगका प्रमुख ज्ञानेश कुमारको राजीनामा माग्दै शनिबार कक्रोच जनता पार्टीले दिल्लीस्थित जन्तर मन्तरमा प्रदर्शनको आह्वान गरेको छ ।

प्रदर्शनलाई ध्यानमा राख्दै दिल्लीको सुरक्षा व्यवस्था चुस्त पारिएको छ भने इन्टरनेट सेवा ठप्प पारिएको छ । दिल्लीका सडकमा हजारौँ प्रहरी र अर्धसैनिक बल परिचालन गरिएको छ । प्रदर्शनका कारण सडक यातायात र रेल सेवा प्रभावित भएको छ ।