काठमाडौं – दक्षिण भारतीय अभिनेता तथा तमिलनाडुका मुख्यमन्त्री सी. जोसेफ विजय र उनकी पत्नी संगीता सोर्नालिङ्गमको वैवाहिक सम्बन्धबारे लामो समयदेखि चल्दै आएको चर्चाले नयाँ मोड लिएको छ। संगीताले सम्बन्धविच्छेदका लागि दायर गरेको निवेदन फिर्ता लिएपछि अदालतले उक्त मुद्दा बन्द गरिदिएको छ।

संगीताले भिडियो कन्फरेन्समार्फत अदालतमा उपस्थित हुँदै सम्बन्धविच्छेदको निवेदन फिर्ता लिने आफ्नो निर्णयबारे जानकारी गराएकी थिइन्। उनले यसअघि फेब्रुअरीमा चेंगलपट्टुस्थित पारिवारिक अदालतमा सम्बन्धविच्छेदका लागि निवेदन दायर गरेकी थिइन्।

निवेदनमा संगीताले दाम्पत्य जीवनमा देखिएको आपसी मतभेदलाई सम्बन्धविच्छेदको आधार बनाएकी थिइन्। साथै, स्थायी भरणपोषण तथा चेन्नईको नीलाङ्कराईस्थित वैवाहिक घरमा बस्न पाउने अधिकारसमेत माग गरिएको थियो।

विजय र संगीताबीचको सम्बन्धविच्छेदसम्बन्धी मुद्दाको सुनुवाइ यसअघि पटक–पटक स्थगित हुँदै आएको थियो। गत जुन १५ मा पनि संगीताले मुद्दा फिर्ता लिन चाहेको जानकारी गराएपछि सुनुवाइ स्थगित गरिएको थियो। त्यसपछि मुद्दाको अर्को सुनुवाइ अगस्ट ७ का लागि तोकिएको थियो।

पछिल्लो सुनुवाइमा भने संगीताले औपचारिक रूपमा निवेदन फिर्ता लिएपछि अदालतले मुद्दा नै टुंग्याएको हो।

विजय र संगीताको वैवाहिक सम्बन्ध करिब तीन दशक पुरानो हो। उनीहरूले सन् १९९९ अगस्ट २५ मा चेन्नईमा परम्परागत हिन्दु विधिअनुसार विवाह गरेका थिए। उनीहरूका दुई सन्तान छन् ।

सन् २०२३ देखि संगीता विजयका महत्वपूर्ण सार्वजनिक कार्यक्रममा कमै देखिन थालेपछि उनीहरूको वैवाहिक सम्बन्धलाई लिएर विभिन्न अड्कलबाजी सुरु भएको थियो। विशेषगरी विजयको राजनीतिक दल तमिलागा वेट्री कझगम (टीभीके) का महत्वपूर्ण कार्यक्रमहरूमा संगीताको अनुपस्थितिले यस्तो चर्चालाई थप बल दिएको थियो।

यद्यपि, संगीताले सम्बन्धविच्छेदको निवेदन फिर्ता लिएसँगै उनीहरूबीचको वैवाहिक सम्बन्धको वास्तविक अवस्था के हो भन्नेबारे थप स्पष्ट जानकारी सार्वजनिक भएको छैन। निवेदन फिर्ता लिनुको कारणबारे पनि दुवै पक्षबाट विस्तृत आधिकारिक धारणा सार्वजनिक भएको छैन।

यससँगै लामो समयदेखि चर्चामा रहेको विजय–संगीताको सम्बन्धविच्छेदसम्बन्धी कानुनी प्रक्रिया भने तत्कालका लागि समाप्त भएको छ।