काठमाडौं- भारतका लागि चिनियाँ राजदूत सु फेइहोङ यतिबेला आफ्नै देशका इन्टरनेट प्रयोगकर्ताको निसानामा परेका छन् । चिनियाँ सामाजिक सञ्जाल ‘वेइबो’ मा उनीविरुद्ध विभिन्न नकारात्मक टिप्पणी भइरहेका छन् । कतिपय प्रयोगकर्ताले उनलाई आफ्नो काम बिर्सिएको आरोप लगाएका छन् भने कतिपयले उनलाई सडक बढार्ने काममा लगाउनु उचित हुने भन्दै व्यङ्ग्यसमेत गरेका छन् ।

विशेषगरी भारत र चीनबीचको भिसा नीतिको विषयलाई लिएर राजदूत फेइहोङको तीव्र आलोचना भएको हो । एक चिनियाँ प्रयोगकर्ताले त उनलाई भारतीय नागरिकहरूलाई चीनमा भित्र्याएर देश बर्बाद पारेको भन्दै ‘देशद्रोही’ को संज्ञासमेत दिएका छन् । चिनियाँ नागरिकहरूले भारतले चिनियाँहरूका लागि भिसा नीतिमा कडाइ गरिरहँदा चीनले भने भारतीयहरूका लागि खुकुलो नीति अपनाएकोमा आपत्ति जनाएका छन् । सन् २०२० को गलवान सैन्य झडपपछि दुई देशबीचको सम्बन्ध चिसिएको बेला यस वर्षको पहिलो तीन महिनामा मात्रै नयाँ दिल्लीस्थित चिनियाँ दूतावासले ८५,००० भारतीयहरूलाई भिसा जारी गरेपछि यो विवाद थप चर्किएको हो ।

यस विवादका बीच चिनियाँ दूतावासले स्पष्टीकरण दिँदै जारी गरिएका भिसाहरूमध्ये ८० प्रतिशतभन्दा बढी व्यापारिक भिसा रहेको र यसले चीनकै अर्थतन्त्रलाई फाइदा पुग्ने जनाएको छ । दूतावासले भारतको भिसा नीति अझै पनि कडा रहेको स्वीकार गरे पनि यस विषयलाई भावनात्मक रूपमा उचाल्दा दुई देशको सम्बन्धमा असर पर्ने चेतावनी दिएको छ । साथै, दूतावासले सामाजिक सञ्जालमा भ्युज (दृश्य) कमाउनका लागि भारतविरुद्ध नकारात्मक र भ्रामक सामग्री फैलाउने कार्यको निन्दा गर्दै यस्तो व्यवहारले एक शक्तिशाली र आत्मविश्वासले भरिएको राष्ट्रको प्रतिनिधित्व नगर्ने स्पष्ट पारेको छ ।