काठमाडौँ – स्वास्थ्य तथा खाद्य स्वच्छता मन्त्रालयले बेडसंख्याअनुसार बुझाउनुपर्ने नियमति शुल्क नतिर्ने ११ वटा स्वास्थ्य संस्थाबाट कुल १ करोड ७८ लाख ८४ हजार रुपैयाँ असुल गर्ने निर्णय गरेको छ । स्वास्थ्यमन्त्री निशा मेहताको निर्देशन र मन्त्रालयको सक्रियतामा उक्त बक्यौता रकम असुल गर्ने निर्णय भएको हो ।

मन्त्रालयका अनुसार स्वास्थ्य क्षेत्रमा सुशासन, पारदर्शिता र कानुनी जवाफदेहिता सुनिश्चित गर्ने उद्देश्यका साथ यो निर्णयलाई कार्यान्वयन प्रक्रियामा लगिएको हो । महालेखा परीक्षकको प्रतिवेदनले औंल्याएका कैफियतहरूलाई सम्बोधन गर्दै बक्यौता रकम असुलीको प्रक्रिया अगाडि बढाइएको मन्त्रालयले जनाएको छ ।

स्वास्थ्यमन्त्री मेहताले स्वास्थ्य सेवा क्षेत्रलाई थप व्यवस्थित, जिम्मेवार र नियमसम्मत बनाउन मन्त्रालय प्रतिबद्ध रहेको बताएकी छन् । उनले कानुन र मापदण्डविपरीत हुने गतिविधिप्रति मन्त्रालयले शून्य सहनशीलता (जिरो टोलरेन्स) को नीति अवलम्बन गर्ने स्पष्ट पारेकी छन् ।