काठमाडौं– नेकपा (एमाले)का अध्यक्ष केपी ओलीले सरकारले आफूलाई पूर्वाग्रह र प्रतिशोधपूर्ण रूपमा फौजदारी अभियोग लगाएर गैरकानुनी नियन्त्रणमा लिएको बताएका छन् ।

१३ दिनको हिरासत बसाइपछि बिहीबार रिहा भएलगत्तै सामाजिक सञ्जाल फेसबुकमा लेख्दै उनलेे मुद्दा चलाउने प्रमाण र आधार नपुगेपछि आफू रिहा भएको बताए ।

‘सरकारले पूर्वाग्रह र प्रतिशोधपूर्ण रूपमा फौजदारी अभियोग लगाई १३ दिनसम्म गैरकानुनी नियन्त्रणमा राखे पनि मुद्दा चलाउने आधार र प्रमाण नपुगेपछि अन्ततः म रिहा भएको छु’, ओलीले लेखेका छन् ।

अध्यक्ष ओलीले आफ्नो रिहाइका लागि आवाज उठाउनेलाई आभार प्रकट गर्दै आफ्नो रिहाइको माग गर्ने क्रममा घाइते भएकाको उपचार राज्यले गर्नुपर्ने र नगरेमा पार्टीले नै गर्ने बताएका छन् ।

यसका साथै, उनले आफ्नो स्वास्थ्य अवस्थाका कारण केही दिन अस्पतालमै रहेर उपचार गराउने पनि सामाजिक सञ्जालमा उल्लेख गरेका छन् ।