जेरुसेलम – इजरायलले लेबनानमा भीषण हवाई आक्रमण गरेपछि अमेरिका र इरानबीच भएको भनिएको दुई हप्ते सर्तसहितको युद्धविराम संकटमा परेको छ । इजरायली आक्रमणमा परी लेबनानमा कम्तीमा १८२ जनाको मृत्यु भएको छ ।

यसको प्रतिक्रियास्वरूप लेबनानी सशस्त्र समूह हिजबुल्लाहले इजरायली भू-भागमा दर्जनौँ रकेट प्रहार गरेको दाबी गरेको छ । इरानको रिभोल्युसनरी गार्ड कोर्प्स (आईजीआरसी) ले इजरायलले आक्रमण नरोके उसलाई ‘पछुतो हुने गरी जवाफ’ दिने चेतावनी दिएको छ । यद्यपि, अमेरिका र इजरायलले भने हालैको युद्धविराम सम्झौतामा लेबनान समावेश नभएको दाबी गर्दै आएका छन् ।

लेबनानमा बढ्दो इजरायली आक्रमणले हालैको विस्तृत युद्धविराम कति समय टिक्ला भन्नेमा गम्भीर प्रश्न खडा गरेको छ । इरानी संसदका सभामुखले युद्धविरामका तीनवटा बुँदा यसअघि नै ‘खुला र स्पष्ट’ रूपमा उल्लंघन भइसकेको आरोप लगाएका छन् । वासिङ्टन र तेहरानबीच इरानले अघि सारेको १० बुँदे योजनाको अन्तरवस्तुमा समेत मतभेद देखिएको छ ।

तनावका बीच शान्ति वार्ताको प्रयास भने जारी छ । ह्वाइट हाउसकी प्रेस सचिव क्यारोलिन लेभिटका अनुसार अमेरिकी उपराष्ट्रपति जेडी भान्सले शनिबार पाकिस्तानमा हुने शान्ति वार्तामा वार्ता टोलीको नेतृत्व गर्नेछन् । यद्यपि, इरानले थप कडा अडान लिँदै अनुमतिबिना हर्मोज जलसन्धि पार गर्ने जहाजलाई ‘निशाना बनाएर ध्वस्त पार्ने’ चेतावनी दिएको छ, जसले विश्वव्यापी तेल आपूर्तिमा जोखिम बढाएको छ ।

यसैबीच, अमेरिकी राष्ट्रपति डोनल्ड ट्रम्प र नेटोका महासचिव मार्क रुटबीचको वार्ता सकारात्मक हुन नसकेको संकेत मिलेको छ । महासचिव रुटले वार्ता ‘स्पष्ट’ भएको बताए पनि ट्रम्पले आफ्नो सामाजिक सञ्जाल ‘ट्रुथ सोसल’ मा नेटोप्रति असन्तुष्टि पोखेका छन् । ट्रम्पले लेखेका छन्, “हामीलाई आवश्यकता परेको बेला सैन्य गठबन्धन (नेटो) साथमा थिएन ।”

क्षेत्रीय तनाव उत्कर्षमा पुगेका बेला शक्तिशाली मुलुकबीचको यो खिचातानीले मध्यपूर्वको संकट झन् लम्बिने देखिएको छ ।