काठमाडौं- अमेरिकी राष्ट्रपति डोनाल्ड ट्रम्पको हत्या गर्ने षड्यन्त्र रचेको आरोप लागेका एक पाकिस्तानी व्यवसायी आसिफ मर्चेन्टले आफूलाई इरानी सरकारले सो कार्यका लागि बाध्य पारेको बयान दिएका छन् । ब्रुकलिन संघीय अदालतमा बुधबार आफ्नो प्रतिरक्षामा गवाही दिँदै ४७ वर्षीय मर्चेन्टले इरानको रिभोलुसनरी गार्ड कोरले तेहरानमा रहेका आफ्ना परिवारलाई मार्ने धम्की दिएकाले मात्र आफू यस योजनामा सहभागी भएको दाबी गरे ।

उर्दू अनुवादकमार्फत बोल्दै उनले आफ्नो इच्छाले नभई डरका कारण इरानी अधिकारीहरूको निर्देशन मानेको बताए । मर्चेन्टले सन् २०२४ मा अमेरिका आएर विरोध प्रदर्शन गर्ने, कागजात चोर्ने, सम्पत्ति शुद्धीकरण गर्ने र हत्याको प्रबन्ध मिलाउने गरी चारवटा योजना कार्यान्वयन गर्न इरानी अधिकारीले खटाएको बताए ।

उनका अनुसार इरानी पक्षले ट्रम्प, वर्तमान राष्ट्रपति जो बाइडेन र निक्की हेलीलाई सम्भावित निशानाको रूपमा नाम लिएका थिए। तर, मर्चेन्टले हत्याका लागि ५ हजार डलर एडभान्स दिएका व्यक्तिहरू वास्तवमा एफबीआईका गुप्तचर एजेन्टहरू थिए, जसले उनको सबै कुराकानी गोप्य रूपमा रेकर्ड गरिरहेका थिए ।

सरकारी अभियोजनकर्ताहरूले भने मर्चेन्टको “दबाबमा परेको” दाबीलाई पूर्ण रूपमा अस्वीकार गरेका छन्। उनी एक आतंकवादी संगठनसँग मिलेर काम गरिरहेको कुरामा सचेत रहेको र होटलको कोठामा बसेर हत्याको नक्सा तयार गरिरहेको भिडियो प्रमाण आफूहरूसँग रहेको अभियोजन पक्षको भनाइ छ ।

मर्चेन्टलाई सन् २०२४ जुलाई १२ मा टेक्सासबाट पक्राउ गरिएको थियो। यो मुद्दाको सुनुवाइ भइरहँदा हालै अमेरिका र इजरायलले इरानमा गरेको आक्रमणमा सर्वोच्च नेता खामेनी र हत्या योजनाका मुख्य नाइके मानिएका इरानी अधिकारी मारिएको पेन्टागनले जनाएको छ।