काठमाडौं- चीनले संस्थागत रुपमा नै तिब्बती सभ्यता र पहिचान मेटाउने अभियान सञ्चालन गरिरहेको भन्दै संयुक्त राष्ट्रसंघले यस्तो गतिविधिविरुद्ध चेतावनी दिएको छ । राष्ट्रसंघको अल्पसङ्ख्यक मामिलासम्बन्धी मानव अधिकार प्रतिनिधि निकोलस लेभर्टले जारी गरेको प्रतिवेदनमा तिब्बती सभ्यता मास्न चीन सक्रिय रहेको उल्लेख छ ।

विश्वभरका घटना सम्मिलित गरेर जारी गरिएको प्रतिवेदनमा तिब्बतको मुद्दा विशेष रुपमा उठाइएको छ । प्रतिवेदनमा तिब्बती जनतामाथि भेदभाव गर्नेमात्रै नभइ पहिचान नै मास्ने गरी राज्य नीति सञ्चालन भइरहेको उल्लेख गरिएको छ ।

चीनले तिब्बतका बालबालिकालाई आवासीय विद्यालयमा भर्ना गराई तिब्बती पहिचान र भाषा निर्मूल पार्ने गतिविधि सञ्चालन गरिरहेको पनि उक्त प्रतिवेदनमा उल्लेख गरिएको छ । यस्ता आवासीय विद्यालयमा तिब्बती नभइ मन्दरिन चिनियाँ भाषा सिकाइने गरिएको, साँस्कृतिक घुलनशीलतालाई प्रोत्साहन गरिएको जनाइएको छ ।

यस्ता गतिविधिले अल्पसङ्ख्यकका रुपमा व्यक्तिको अस्तित्व र पहिचानमा नकारात्मक प्रभाव पार्ने पनि प्रतिवेदनमा जनाइएको छ । राष्ट्रसंघीय प्रतिवेदनको प्रसंशा गर्दै जेनेभास्थित तिब्बत ब्युरोमा दलाई लामाका प्रतिनिधि थिन्ले चुक्कीले चिनियाँ नीतिका कारण तिब्बतमा सभ्यता मासिएको विषय फेरि पुष्टि भएको जनाएका छन् ।