काठमाडौं– अखिल नेपाल फुटबल संघ (एन्फा) ले आगामी फागुन १ गतेदेखि उदयपुरमा सुरु हुने एन्फा महिला च्याम्पियनसिपको सम्पूर्ण तयारी पुरा भएको जनाएको छ । 

एन्फाले सोमबार ललितपुरमा पत्रकार सम्मेलन गर्दै एन्फाले आगामी फागुन १ देखि ९ गतेसम्म उदयपुरको त्रियुगा नगरपालिकास्थीत थरुहट रंगशालामा आयोजना हुने एन्फा महिला च्याम्पियनसिप नकआउट फुटबल प्रतियोगिताको सम्पूर्ण तयारी पुरा भएको जनाएको हो ।

प्रतियोगितामा गाईघाट एफसी, न्युरोड टीम, त्रिभुवन आर्मी क्लव, नेपाल पुलिस क्लव, एफसी रियाले, एपीएफ फुटबल क्लव, आरएस रिर्सोट एण्ड विच भलिबल टिम , चर्च व्वाईज युनाइटेड, छहारी एफसी र संकटा एफसी गरि १० टीमको सहभागीता रहने एन्फाले जनाएको छ ।

प्रतियोगिताको बिजेतालाई ७ लाख ५० हजार रुपैयाँ, उपबिजेतालाई ५ लाख रुपैयाँ प्रदान गरिने छ भने फेयर प्ले टीमलाई ५० हजार रुपैयाँ, उत्कृष्ट खेलाडी, गोलकिपर र उच्च गोलकर्तालाई ५० हजार रुपैयाँ प्रदान गरिने प्रतियोगिता निर्देशक सञ्जीव मिश्रले जानकारी दिए ।

प्रतियोगिताको अनुमानित बजेट १ करोड २० लाख ६२ हजार रुपैयाँ रहेको एन्फाले जनाएको छ ।