काठमाडौं – बलिउड सुपरस्टार नायक सञ्जय दत्त काठमाडौंको दुई दिने भ्रमणमा छन् । उनी एक जुवाघर उद्घाटनका लागि बिहीबार आए पनि राजनीतिक व्यक्तिसँगको भेटघाट र व्यक्तिगत घुमघामले चर्चामा छन् ।

नेपाल आएका बलिउड स्टार दत्तको चर्चा हुनु ठूलो कुरा होइन । उनको फ्यानबेस नेपालमा पनि राम्रो छ । नेपाली स्टारहरुले समेत उनीसँग भेट गरेको तस्बिर सार्वजनिक गरेका छन् ।

दत्तले बिहीबार साँझ पूर्वप्रधानमन्त्री तथा नेपाल कम्युनिस्ट पार्टीका संयोग पुष्पकमल दाहाललाई भेटे । शुक्रबार उनी पशुपति मन्दिर दर्शन गर्न पुगे । उनका गतिविधि दर्शकहरुले चासोका साथ हेरेका छन् ।

व्यवसायिक कारणले काठमाडौं आएका दत्त व्यक्तिगत गतिविधिमा पनि सहभागी भएका हुन् ।

संयोग, दत्त काठमाडौं भ्रमणमा रहेका दौरान उनको अभिनय रहेको दुई फिल्म प्रदर्शनरत छ । शुक्रबारबाट उनको अभिनय रहेको फिल्म ‘राजासाब’ प्रदर्शनमा आएको छ ।

उनको अभिनय रहेको अर्को फिल्म ‘धुरन्धर’ डेसेम्बर ५ देखि प्रदर्शनरत छ । भारतमा सर्वाधिक व्यापार गरेर कीर्तिमान राखेको यो फिल्मले नेपालमा पनि १० करोडमाथि व्यापार गरेको छ ।

दत्त नेपाल भ्रमण सकेर आजै दिल्ली फर्किने बताइएको छ ।