काठमाडौं– बलिउडका चर्चित निर्देशक प्रियदर्शन र सुपरस्टार अक्षय कुमारबीच १४ वर्षपछि फिल्म ‘भूत बंगला’ मा पुनर्मिलन हुँदैछ । फिल्मलाई यस वर्षको सबैभन्दा प्रतीक्षित हरर–कमेडी चलचित्रमध्ये एक मानिएको छ ।

भारतीय मिडियाका अनुसार निर्माताहरूले सुरुमा यो फिल्म २ अप्रिलमा प्रदर्शन हुने तय गरेका थिए, तर पछि नयाँ मिति १५ मे २०२६ मा रिलिज हुने घोषणा गरेका छन् । निर्माताहरूले सामाजिक सञ्जालमा फिल्मको पोस्टर शेयर गर्दै फ्यानहरूलाई सिनेमा हलमा स्वागत गर्ने आमन्त्रण पनि दिएका छन् ।

फिल्म ‘भूत बंगला’ मा अभिनेता अक्षय कुमार, तबु, परेश रावल, राजपाल यादव, जस्सु सेनगुप्ता, अस्रानी र वामिका गब्बी जस्ता चर्चित कलाकारहरू मुख्य भूमिकामा छन् । राजस्थान, जयपुर र हैदराबादमा फिल्मका केही दृश्य खिचिएकोले कथा दृश्यात्मक रूपमा आकर्षक र रोमाञ्चक बन्ने अपेक्षा गरिएको छ ।

‘भूत बंगला’ प्रियदर्शनको निर्देशनमा, शोभा कपूर, एकता आर कपूर र अक्षय कुमारको केप अफ गुड फिल्म्सद्वारा निर्माण गरिएको छ । फिल्ममा कथा लेखन आकाश ए कौशिक, पटकथा रोहन शंकर, अभिलाष नायर र प्रियदर्शन तथा संवाद भने रोहन शंकरले तयार पारेका हुन् ।

१४ वर्षपछि फ्यानहरूले प्रतिक्षा गरेको प्रियदर्शन–अक्षयको जादू फिर्ता ल्याउने यस हरर-कमेडी फिल्मले सिनेमा हलमा दर्शकलाई भरपूर मनोरञ्जन दिने निश्चित छ।