काठमाडौं- १५ औँ महाधिवेशनमा सहभागी सबैभन्दा कान्छी प्रतिनिधि अभिप्सा पौडेलले नेपाली कांग्रेस बूढापाकाको मात्र नभएर सबै पुस्ताको साझा पार्टी भएको स्पष्ट पारेकी छन् । पछिल्लो समय सामाजिक सञ्जालमा निकै भाइरल भइरहेकी पौडेलले महाधिवेशन स्थलमा सञ्चारकर्मीसँग कुराकानी गर्दै सबै पुस्ताको समायोजनबाट नेपाली कांग्रेसलाई अझ बलियो र समावेशी बनाउनुपर्ने धारणा व्यक्त गरेकी हुन् ।

पार्टीभित्र युवाहरूको प्रतिनिधित्व र अवसरबारे बोल्दै पौडेलले गगन थापालगायतका नेताहरूले पार्टीमा युवाहरूका लागि ढोका खोलेको र त्यो अवसरलाई सही सदुपयोग गर्दै अघि बढ्नुपर्ने बताएकी छन् । युवा पुस्तामा बढ्दै गएको बेरोजगारी, मानसिक स्वास्थ्यका समस्या तथा तीव्र रूपमा भइरहेको वैदेशिक पलायनजस्ता मुख्य समस्याहरूलाई सम्बोधन गर्नु आफ्नो मुख्य प्राथमिकता रहेको उनको भनाइ छ ।

आफू अझै सिक्दै र अध्ययन गर्दै गरेको परिपक्व उम्मेदवार बन्ने क्रममा रहेको स्वीकार गर्दै उनले पुराना र अनुभवी नेताहरूबाट धेरै कुरा सिक्न बाँकी रहेको उल्लेख गरिन् । महाधिवेशनमा प्रतिनिधिको सकारात्मक प्रतिक्रिया पाइरहेको बताउँदै उनले लोकतान्त्रिक चुनावमा हार–जित स्वाभाविक प्रक्रिया भएकाले चुनावी परिणामलाई सहर्ष स्वीकार गर्ने प्रतिबद्धता जनाएकी छन् ।