काठमाडौं– अरूको नजरमा राम्रो देखिने दबाबभन्दा आफूलाई स्वीकार गर्नु महत्त्वपूर्ण छ । बलिउड अभिनेत्री कट्रिना कैफले गर्भावस्थापछि बढेको तौललाई लिएर सामाजिक सञ्जालमा भइरहेको आलोचनाबीच आत्मविश्वास र आत्मसम्मानबारे आफ्नो धारणा सार्वजनिक गरेकी छन् ।

हालै एक कार्यक्रममा बोल्दै कट्रिनाले सामाजिक सञ्जालमा आउने प्रतिक्रियालाई आफ्नो आत्ममूल्यसँग जोड्न नहुने बताइन्। उनका अनुसार सबैको विचारअनुसार आफूलाई बदल्न खोज्दा मानिसले आफ्नै निर्णय गर्ने क्षमता गुमाउन सक्छ ।

‘कहिलेकाहीँ संसारले तपाईंको प्रशंसा गर्छ। तर अन्य समयमा तपाईं आफैँ आफ्नो सबैभन्दा ठूलो समर्थक बन्नुपर्ने हुन्छ,’ उनले भनिन् ।

कट्रिनाले जीवनका हरेक चरणमा आफूलाई हेर्ने दृष्टिकोण एकनासको नहुने पनि बताइन् । कहिले आफूलाई राम्रो महसुस हुने त कहिले आफ्नै बारेमा सकारात्मक सोच राख्न कठिन हुने भन्दै उनले यस्ता अवस्थालाई स्वाभाविक रूपमा लिनुपर्ने धारणा राखिन् ।

उनको यो भनाइ हालै सामाजिक सञ्जालमा भएको आलोचनासँग जोडिएको छ । अम्बानी परिवारको गणेश चतुर्थी समारोहमा पति विक्की कौशलसँग सहभागी भएकी कट्रिनाको भिडियो भाइरल भएपछि केही प्रयोगकर्ताले गर्भावस्थापछि बढेको उनको तौललाई लिएर टिप्पणी गरेका थिए। त्यसपछि सलमान खानसहित केही कलाकारले उनको समर्थन गरेका थिए ।

कट्रिनाले सन् २०२१ मा विक्की कौशलसँग विवाह गरेकी थिइन्। सन् २०२५ मा उनीहरूले छोरा विहानलाई स्वागत गरेका थिए ।

सामाजिक सञ्जालमा हुने आलोचनाका बीच कट्रिनाको भनाइले एउटा महत्त्वपूर्ण सन्देश दिन्छ-अरूले के भन्छन् भन्नेभन्दा आफूले आफूलाई कसरी स्वीकार गर्छौं भन्ने कुरा बढी महत्त्वपूर्ण हुन्छ ।