काठमाडौँ – रौतहटको लालबकैया नदीमाथि निर्माणाधीन पुल लामो समयको अन्योल र ढिलाइपछि सञ्चालनमा आउने चरणमा पुगेको छ ।

पुलका सबै ६ वटा स्पानको निर्माण सम्पन्न हुनुका साथै फुटपाथ, रेलिङ र एक्सपान्सन जोइन्टको कामसमेत सकिएको पूर्वाधार विकासमन्त्री सुनिल लम्सालले जानकारी दिनुभएको छ ।

मन्त्री लम्सालका अनुसार ३ वर्षभित्र निर्माण सम्पन्न गर्ने लक्ष्यसहित २०७१ सालमा ठेक्का सम्झौता भएको उक्त पुल पटक-पटक म्याद थप्दा पनि पूरा हुन सकेको थिएन । निर्माणमा चरम ढिलाइ भएपछि सम्बन्धित निर्माण कम्पनीलाई कालोसूचीमा राखेर बाँकी कामका लागि २०७९ सालमा पुनः ठेक्का आह्वान गरिएको थियो ।

तर, नयाँ ठेक्का सम्झौता भएको १ वर्षसम्म पनि निर्माण कार्य अघि बढ्न सकेको थिएन । पुरानो ठेक्काअन्तर्गत निर्माण गरिएको सबस्ट्रक्चरको जिम्मेवारी स्पष्ट नहुनु र पर्याप्त बजेट विनियोजन नहुनु निर्माणमा ढिलाइ हुनुका प्रमुख कारण रहेको मन्त्री लम्सालले बताउनुभयो ।

समस्या पहिचानपछि डिभिजन कार्यालयमार्फत पुरानो निर्माण कार्यको जिम्मेवारी स्पष्ट पारिएको र आवश्यक बजेटको पूर्ण व्यवस्थापन गरेर निर्माणलाई तीब्रता दिइएको उहाँको भनाइ छ ।

हाल पुलका मुख्य संरचनासहित फुटपाथ, रेलिङ र एक्सपान्सन जोइन्टको काम सम्पन्न भइसकेको छ । एप्रोच रोड र रिभर ट्रेनिङको काम भने जारी रहेको मन्त्री लम्सालले जानकारी दिनुभएको छ ।

लामो समयदेखि रुग्ण आयोजनाका रूपमा रहेको लालबकैया पुलको निर्माण अन्तिम चरणमा पुगेसँगै स्थानीय बासिन्दाको आवागमन सहज हुने तथा क्षेत्रीय यातायात सञ्जालमा ठूलो सुधार आउने अपेक्षा गरिएको छ ।