काठमाडौं– दशैँको माहोल सुरु हुँदै गर्दा नेपाली फिल्म ‘अक्षरा’ शुक्रबारदेखि प्रदर्शनमा आएको छ । पारिवारिक सम्बन्ध, सामाजिक सोच र छोरीको जीवनसम्बन्धी निर्णयमा अभिभावकको भूमिकालाई प्रश्न गर्ने फिल्मले विशेषगरी छोरीको इच्छा र स्वतन्त्रताको विषयलाई उठाएको छ ।

विनयराज पौडेलको निर्देशनमा बनेको ‘अक्षरा’ मा सुशील सिटौला र न्यान्सी खड्का मुख्य भूमिकामा छन् । फिल्ममा सुशील पोखरेल, अंशु महर्जन, पुष्कर राउत, रिस्ता अधिकारी, उत्तम केसी र गीता अधिकारीलगायत कलाकारको अभिनय छ ।

फिल्मको कथाले अभिभावकले छोरीको इच्छा र चाहनालाई बेवास्ता गर्दै विवाह गराउँदा परिवारमा कस्ता समस्या उत्पन्न हुन सक्छन् भन्ने विषयलाई समेटेको छ ।

विवाहजस्तो महत्त्वपूर्ण निर्णयमा छोरीको चाहनालाई कत्तिको महत्त्व दिइन्छ र आफ्नो जीवनसाथी रोज्ने अधिकार उनलाई कति छ भन्ने प्रश्न पनि फिल्मले उठाएको छ।

पारिवारिक सम्बन्धसँगै सामाजिक सोच र व्यक्तिगत स्वतन्त्रतालाई कथामा जोडेको ‘अक्षरा’ ले दर्शकलाई छोरीको इच्छा र निर्णयको सम्मान गर्नुपर्ने सन्देश दिने निर्माण पक्षको भनाइ छ।

फिल्मले केन्द्रीय चलचित्र जाँच समितिबाट युनिभर्सल (यू) प्रमाणपत्र प्राप्त गरेको छ। अब पारिवारिक कथा र सामाजिक विषयवस्तुमा आधारित यो फिल्मले दर्शकको मन कत्तिको जित्न सक्छ भन्ने चासो छ।