काठमाडौं- भारतमा नवीकरणीय ऊर्जाको उत्पादनमा भएको उल्लेख्य वृद्धिले विद्युत प्रवाहमा कोइलाको हिस्सालाई कम गराएको छ। सरकारी तथ्याङ्कअनुसार जुलाई महिनामा भारतको कूल विद्युत उत्पादनमा नवीकरणीय ऊर्जाको योगदान बढेर २० प्रतिशत पुगेको छ, जुन अहिलेसम्मकै उच्च हो। जुलाईमा नवीकरणीय ऊर्जाबाट ३६ अर्ब २५ करोड किलोवाट-घण्टा विद्युत उत्पादन भएको छ, जुन गत वर्षको सोही अवधिको तुलनामा ३० प्रतिशतले बढी हो।

विशेषगरी सोलार र वायु ऊर्जाको उत्पादन क्षमता एक सय गिगावाट नाघेको छ। जुलाई १३ तारिखका दिन मात्र भारतको कूल विद्युत आपूर्तिमा यी स्रोतहरूको योगदान कीर्तिमानी ४२.८ प्रतिशत पुगेको थियो। ऊर्जा विज्ञहरूका अनुसार दिउँसोको समयमा बढ्दो मागलाई सोलार ऊर्जाले सफलतापूर्वक सम्बोधन गरिरहेको छ, जसले गर्दा कुल मिश्रणमा नवीकरणीय ऊर्जाको हिस्सा बढ्दै गएको छ। यसको सकारात्मक प्रभावस्वरूप जुन महिनामा ६९ प्रतिशत रहेको कोइलाबाट उत्पादित विद्युतको हिस्सा जुलाईमा ६५.७ प्रतिशतमा झरेको छ।

यद्यपि, भारतमा कोइलाबाट उत्पादित विद्युतको मात्रा भने गत वर्षको जुलाईको तुलनामा १२.८ प्रतिशतले बढेर ११ अर्ब ९४ करोड किलोवाट-घण्टा पुगेको छ। यसको मुख्य कारण ‘एल निनो’ प्रभावका कारण वर्षा कम भई जलविद्युत उत्पादनमा आएको गिरावट हो। गर्मी बढेसँगै रातिको समयमा चिसोका लागि विद्युतको माग उच्च हुनु र जलविद्युतको कमीलाई पूर्ति गर्न कोइलाको प्रयोग बढाउनुपर्ने बाध्यता देखिएको छ।

विज्ञहरूले जलविद्युतको कमी र बढ्दो मागका कारण आगामी दिनमा विद्युत आपूर्तिको खाडल बढ्न सक्ने र त्यसले कोइलाको प्रयोगलाई अझ बढाउन सक्ने चेतावनी पनि दिएका छन्। कुल मिलाएर जुलाई महिनामा भारतको विद्युत उत्पादन गत वर्षको तुलनामा १०.४ प्रतिशतले बढेर १८१ अर्ब ७९ करोड किलोवाट-घण्टा पुगेको छ।