काठमाडौं – ‘कन्टेन्टमा दम’ भएका फिल्मको प्रचार दर्शकले नै गरिदिन्छन् । त्यसैलाई ‘माउथ पब्लिसिटी’ भनिँदै आएको हो ।
प्रचारमा जति फन्डा गरे पनि कन्टेन्टमा दम नभएका फिल्महरू बक्स अफिसमा पछारिने नै हुन् । स्टार नायक-नायिका पनि अब फिल्म चल्ने कारक रहेनन् ।
प्रदर्शनरत ‘गौँथली’ले फेरि स्पष्ट पारेको छ- दर्शकले कथा नै हेर्न चाहेका छन् ।
‘गौँथली’का नायक अरुण क्षेत्री र नायिका सिम्रन खड्का दुवै स्टार कलाकार होइनन । डा. कपिल रिजाल पनि सेलिब्रिटी निर्देशक होइनन् ।
अझ निर्देशक त दन्त चिकित्सक हुन् । फिल्म मेकिङ उनका लागि फगत प्यासन हो ।
यी कारणले पनि ‘गौँथली’ हलमा लाग्दै गर्दा धेरैले ‘हिट हुने आधार’ देखेका थिएनन् । किनकि हिट हुनका लागि चाहिने ट्रेडिसनल मानक यस फिल्ममा थिएन । जस्तो– स्टार कलाकार, चटपटे संवाद र प्रचारका विभिन्न फन्डा ।
तर, कुनै फिल्म यसरी ‘अन्डरडग’ साबित हुन्छन् कि– ठूला ब्यानारका बलिया कीर्तिमान हलचल हुन्छन् । समग्र फिल्म क्षेत्रले ‘अन्डरडग’ फिल्मको प्रभाव कमै अनुभव गर्न पाउँछ ।
त्यो ‘अन्डरडग’ फिल्म हो- गौँथली ।
यसकारण गौँथली ‘अन्डरडग’
नयाँ निर्देशकले नयाँ कलाकार लिएर बनाएको फिल्म हो– गौँथली ।
प्रचारमा पनि साह्रो तडकभडक भएन । प्रदर्शनअघिका दिनसम्म ‘गौँथली’ इन्डस्ट्रीले हिट अपेक्षा गरेको फिल्म होइन ।
विदेशी फिल्मका कारण हलहरूले यस फिल्मको शो संख्या कटौती गरेको यथार्थ पनि छ ।
तर, भयो के ? ‘गौँथली’ बन्यो ब्ल्कबस्टर ।
निर्माण पक्षकाअनुसार प्रदर्शनको सुरुवाती २३ दिनमा यो फिल्मको व्यापार १९ करोड कटेको छ ।
‘गौँथली’ले बक्स अफिसमा छक्का पञ्जा टिमले बनाएको सबै फिल्मलाई उछिनेको छ । ‘छक्का पञ्जा’ टिमले बनाएको सबैभन्दा बढी व्यापार गर्ने फिल्म ‘छक्का पञ्जा ४’ हो । त्यसले १७ करोड ५३ लाख ग्रस कलेक्सन गरेको छ ।
यससँगै ‘गौँथली’ सर्वाधिक व्यापार गर्ने चौथो फिल्म बनेको छ । यसले २१ करोड व्यापार गरी सर्वाधिक ग्रस कलेक्सन गर्ने दोस्रो फिल्म ‘कबड्डी ४’लाई उछिन्ने छनक देखाएको छ ।
‘गौँथली’ले सतप्रतिशत हिट फिल्म दिने बजारका दुई सफल ब्यानर ‘छक्का पञ्जा टिम’ र ‘जात्रा सिरिज’ निर्माण गर्ने षट्कोण आर्टस्लाई ग्रस कलेक्सनमा उछिनेको छ ।
‘गौँथली’ अफ सिजनमा रिलिज भएको फिल्म हो । प्रायः मेकरहरू लामा छुट्टी र सार्वजनिक बिदा हेरेर फिल्म हलमा लैजान्छन् । अझ, असार र साउनमा वर्षाको डरले फिल्म हलमा लगाउन उचित ठान्दैनन् ।
तर, साउनै प्रदर्शनमा आएर फिल्मले ब्ल्कबस्टर व्यापार गरेको छ । त्यसकारण पनि यो फिल्म ‘अन्डरडग’ हो ।
अन्तर्वार्ताको रणनीति सफल
यो फिल्मको हाइप बढाएको जस अरुण र सिम्रनले नै लिन पाउँछन् ।
फिल्ममा निर्वाह गरेकै चरित्रमा अन्तर्वार्ता दिएपछि यो फिल्मप्रति दर्शकको चासो बढेको हो । पत्रकार प्रकाश सुबेदीसँगको उक्त अन्तर्वार्ताबाट स्रिमन र अरुण दुवैले दर्शकबाट सहानुभूति बटुलेका थिए ।
यसको असर बुकिङमा देखियो । त्यसपछिको माउथ पब्लिसिटीले यो फिल्मको व्यापार हरेक साता बढ्दै छ ।
तेस्रो साता अर्थात् साउन १७ देखि २३ गतेसम्म यो फिल्मको व्यापार ७ करोड छ । जुन अघिल्ला साताका सरह हो ।
अरुणको व्यस्तता
अरुण लामो समयदेखि संघर्षरत नायक हुन् ।
उनी शीर्ष भूमिकामा देखिएको पहिलो फिल्म नै ‘गौँथली’ हो । तर, यो उनको पहिलो फिल्म होइन ।
यो हिट भएपछि एकै निर्देशकसँग उनले दुई फिल्मका लागि साइन गरेका छन् ।
अरुणले निर्देशक मिलन चाम्ससँग दुई बायोपिक ‘म मदनकृष्ण’ र अनटाइटल फिल्म हरिवंशको बायोपिकका लागि साइन गरेका हुन् ।
लेजेन्ड कलाकार हरिवंशको भूमिकाका लागि उनी दुवै फिल्ममा फाइनल भएको मिलनले बताए ।
‘गौँथली’ हरेपछि अरुणमा सम्भावना देखेकाले बायोपिकमा लिने निर्णय गरेको उनले जानकारी दिए ।
प्रतिक्रिया