काठमाडौं- विश्वकपको राउन्ड अफ १६ को खेलमा अर्जेन्टिनासँग ३-२ ले पराजित भएपछि इजिप्टले खेल अधिकारीहरूमाथि गम्भीर आरोप लगाएको छ । एटलान्टामा भएको उक्त खेलमा साविक विजेता अर्जेन्टिनाले उत्कृष्ट पुनरागमन गरे पनि खेलका दौरान भिडियो असिस्टेन्ट रेफ्रीको निर्णय विवादमा तानिएको छ ।

खेलको ५८औँ मिनेटमा इजिप्टले गरेको दोस्रो गोललाई भीएआरले अमान्य घोषित गरेको थियो । तर खेलको अन्तिम समयमा अर्जेन्टिनाले तेस्रो गोल गर्नुअघि इजिप्टका मोहमद सलाहमाथि उस्तै फउल भएको थियो । यसबेला भने भीएआर मौन रह्यो ।

इजिप्टका मुख्य प्रशिक्षक होसाम हसनले फिफा र रेफ्रीहरूले विश्वकपमा लियोनेल मेसीजस्ता ठूला स्टार र डिफेन्डिङ च्याम्पियन टोलीलाई जोगाउन दबाबमा काम गरेको आरोप लगाएका छन् । उनले मैदान बाहिरका तत्वहरूले खेलमा प्रभाव पारेको र अर्जेन्टिनालाई हरेक स्तरबाट सहयोग मिलेको दाबी गरे ।

अमेरिकी राष्ट्रपति डोनल्ड ट्रम्पले फिफालाई दबाब दिएर अमेरिकी खेलाडीको प्रतिबन्ध फुकुवा गराएको विवाद सेलाउन नपाउँदै यो अर्को नयाँ विवाद सतहमा आएको हो ।

खेल विश्लेषकहरूले पनि ट्रम्प प्रशासन र अर्जेन्टिनाका राष्ट्रपति हाभियर मिलेईबीचको निकट सम्बन्ध तथा प्रशिक्षक हसनले प्यालेस्टाइनको समर्थनमा दिएको अभिव्यक्तिका कारण रेफ्रीहरूमा पूर्वाग्रह देखिएको हुनसक्ने आशंका गरेका छन् । पोर्चुगिज फुटबल आइकन जोसे मौरिन्होले त यो खेल ‘दिउँसै लुटिएको’ टिप्पणी गरेका छन् ।

खेलको प्राविधिक पक्षलाई हेर्दा, इजिप्टको गोल रद्द गराउने फउल सामान्य हुदाँहुदै पनि भीएआरले निकै पछिसम्मको फुटेज हेरेर निर्णय उल्ट्याएको थियो । अचम्मको कुरा, खेल विश्लेषकहरूका अनुसार रेफ्रीको निर्णय एकतर्फी देखिन्थ्यो र सबै ५०-५० को सम्भावना भएका निर्णयहरू अर्जेन्टिनाकै पक्षमा गइरहेका थिए ।