काठमाडौँ – नेपाली राष्ट्रिय क्रिकेट टोलीका अलराउन्डर दीपेन्द्रसिंह ऐरीले सोमबार आफ्नो खेल जीवनको ऐतिहासिक १०० औँ अन्तर्राष्ट्रिय टी–२० (टी–२० आई) म्याच खेल्दैछन्। सिंगापुरमा जारी एसियन गेम्स पुरुष टी–२० क्वालिफायरको फाइनल खेलमा मैदान उत्रिँदा दीपेन्द्रका लागि यो खेल विशेष कोसेढुङ्गा बन्नेछ।

नेपालले आज उपाधिका लागि हङकङको सामना गर्दैछ। सिंगापुरको नेसनल क्रिकेट ग्राउन्डमा हुने यो फाइनल खेल नेपाली समय अनुसार दिउँसो १२:१५ बजे सुरु हुँदैछ ।

नेपाली टोलीको कप्तानी सम्हालिरहेका दीपेन्द्रले यस ऐतिहासिक खेलमा टोलीलाई उपाधि दिलाउने लक्ष्य राखेका छन्। आइतबार भएको सेमिफाइनल खेलमा ओमानलाई ८ विकेटले सहजै पराजित गर्दै नेपाल फाइनलमा प्रवेश गरेको हो।
यसअघि नेपालले समूह चरणको पहिलो खेलमा चीनलाई २२१ रन र दोस्रो खेलमा मलेसियालाई १६७ रनको विशाल अन्तरले पराजित गरेको थियो।

नेपालका लागि टी–२० अन्तर्राष्ट्रिय क्रिकेटमा सर्वाधिक रन बनाउने कीर्तिमान समेत बनाएका दीपेन्द्र आजको खेलसँगै नेपालका लागि १०० टी–२०आई खेल खेल्ने पहिलो खेलाडी बन्दै इतिहास रच्ने छन्।