काठमाडौं- स्वीडेनमा एउटा तेल ट्याङ्करका चिनियाँ क्याप्टेन पक्राउ परेका छन्। उनलाई नक्कली कागजात राखेको र समुद्री नियम उल्लंघन गरेको आरोप लागेको छ। स्वीडेनी सरकारी वकिलले सोमबार यसको जानकारी दिएका हुन्।

स्वीडेनको तटरक्षक र प्रहरी टोली आइतबार उक्त जहाजमा प्रवेश गरेका थिए। ‘जिन हुइ’ नामको उक्त जहाजमा सिरियाको झण्डा राखिएको थियो। त्यो जहाज स्वीडेनको समुद्री क्षेत्रमा फेला परेको हो । पक्राउ परेका क्याप्टेनको नाम खुलाइएको छैन । उनलाई सोमबार नै बयान लिइने बताइएको छ ।

यो जहाज रूससँग सम्बन्धित ‘श्याडो फ्लिट’ को हिस्सा भएको आशंका गरिएको छ । रूसले युक्रेन युद्धका कारण लागेको पश्चिमी प्रतिबन्ध छल्न यस्ता गोप्य जहाजहरू प्रयोग गर्ने गर्छ ।

युरोपेली देशहरूले आजकल यस्ता शंकास्पद जहाजहरूमाथि कडा निगरानी राखेका छन्। स्वीडेनले यस वर्ष मात्रै यस्तो पाँचौँ कारबाही गरेको हो। यस घटनाबारे रूसले हालसम्म कुनै टिप्पणी गरेको छैन। तर रूसले विगतमा आफ्ना जहाज रोक्ने कार्यको विरोध गर्दै आएको थियो।

पक्राउ परेका क्याप्टेनले आरोपबारे केही स्पष्ट पारेका छैनन् । यो जहाज कता जाँदै थियो भन्ने पनि खुलेको छैन । जहाजमा कुनै सामान नभएको बताइएको छ । तर यो जहाज युरोपेली संघ र बेलायतको प्रतिबन्धको सूचीमा परेको फेला परेको छ ।