बेरूत- लेबनानको दक्षिणी क्षेत्रमा इजरायली हवाई हमलामा लेबनानी सिभिल डिफेन्सका एकजना सदस्यको मृत्यु भएको छ।

सिभिल डिफेन्सले जारी गरेको विज्ञप्तिअनुसार राशाया–कफरशौबा सडकमा कार्यरत एक कर्मचारीले इजरायली एयरस्ट्राइकको निशानामा परेर ज्यान गुमाएका हुन्।

यसअघि इजरायलले दक्षिणी लेबनानका विभिन्न सहर र गाउँका बासिन्दालाई तत्काल घर खाली गर्न चेतावनी दिएको थियो।

इजरायली सेनाका अरबी भाषाका प्रवक्ता अभिच्ये अड्रियले सामाजिक सञ्जाल एक्समा पोस्ट गर्दै अल नमरियाह, तायर फिलिसिया, हल्लुसियाह, अपर हल्लुसियाह, तुराह र मरकाह क्षेत्रका बासिन्दालाई तुरुन्त सुरक्षित स्थानतर्फ जान आग्रह गरेका थिए।

उनले हिजबुल्लाहसँग सम्बन्धित ठेगाना, हतियार वा लडाकु नजिक रहेका व्यक्तिहरूको ज्यान जोखिममा पर्न सक्ने चेतावनी दिएका थिए।