काठमाडौं– नेपाल मगर महिला संघको आठौँ राष्ट्रिय महाधिवेशन यही चैत्र २७ गतेदेखि काठमाडौंमा आयोजना हुने भएको छ ।

संघले बुधबार काठमाडौंमा पत्रकार सम्मेलन गर्दै आदिवासी मगर महिलाको अभियान, आत्मनिर्णयको अधिकार सहितको पहिचान भन्ने नाराका साथ आठौँ राष्ट्रिय महाधिवेशन चैत्र २७ गतेदेखि काठमाडौंमा आयोजना गर्न लागिएको जनाएको हो ।

संघकी अध्यक्ष हिरुसरा रानाले महिलाहरूको हकअधिकार, समानता र पहिचानका मुद्दालाई केन्द्रमा राख्दै महाधिवेशनले नयाँ नेतृत्व चयन गर्ने जानकारी दिइन्  । महाधिवेशनलाई मगर समुदायको हकहित, पहिचान र सशक्तीकरणको दिशामा महत्त्वपूर्ण कदमका रूपमा हेरिएको उनले बताइन्

संघले मगर भाषालाई सरकारी कामकाजको भाषा बनाउन तथा प्रदेश स्तरमा कानुनी रूपमा कार्यान्वयन गर्न पनि जोड दिएको छ । हाल संघको संगठन ७ प्रदेश, ५७ जिल्ला र तीन देशमा विस्तार भइसकेको जनाइएको छ ।