काठमाडौं– नेपालका लागि हुवावे उत्पादनहरूको एक मात्र आधिकारिक राष्ट्रिय वितरक कल मोबिलिटी प्रालिले नेपालको तीव्र गतिमा फैलिरहेको फिट्नेस समुदायमध्येको एक, ‘मेल्टडाउन नेपाल’ सँग एक वर्ष लामो सहकार्यको घोषणा गरेको छ ।

यो साझेदारीको मुख्य उद्देश्य हुवावेको वेयरेबल प्रविधिलाई वास्तविक जीवनका अनुभवहरू, सामुदायिक संलग्नता र फिट्नेसमा आधारित अभियानहरूमार्फत नेपालका सक्रिय र स्वास्थ्य–सचेत दर्शकहरूको नजिक पुर्‍याउनु रहेको जनाइएको छ ।

मेल्टडाउनले दौड, तालिम सत्रहरू र डिजिटल सामग्रीका माध्यमबाट युवा पेशेवर र फिट्नेस प्रेमीहरूको जीवन्त समुदायलाई एकै ठाउँमा ल्याउँछ । यसले गर्दा हुवावेलाई आफ्नो लक्षित दर्शकसँग अर्थपूर्ण र व्यावहारिक रूपमा जोडिनका लागि यो एउटा उपयुक्त प्लेटफर्म बनेको छ ।

यो साझेदारी औपचारिक रूपमा अप्रिल १५, २०२६ बाट सुरु हुने जनाइएको छ । सोही दिन नेपालमा ‘हुवावे ब्यान्ड ११ सिरिज’को भव्य सार्वजनिक (लन्च) गरिनेछ, जसले यस सहकार्यको उत्साहजनक सुरुवात गर्नेछ ।

सो साझेदारीका बारेमा बोल्दै कल मोबिलिटी प्रालिकी मार्केटिङ म्यानेजर विजया रोका क्षेत्रीले भनिन्, ‘यो सहकार्यले प्रविधिलाई दैनिक जीवनशैलीमा एकीकृत गर्ने र फिट्नेसमा चासो राख्ने समुदायसँग प्रत्यक्ष रूपमा जोडिएर नेपाललाई फिट र स्वस्थ देश बनाउने हाम्रो लक्ष्यलाई प्रतिबिम्बित गर्दछ ।’

हुवावे स्मार्टफोन, वेयरेबल (लगाउन मिल्ने उपकरण) र स्मार्ट डिभाइसहरूको क्षेत्रमा आफ्नो नवप्रवर्तनका लागि परिचित विश्वव्यापी प्रविधि अग्रणी कम्पनी हो, जसले विशेष गरी स्वास्थ्य र फिट्नेस प्रविधिमा ध्यान केन्द्रित गर्दै आएको छ ।