वाशिंटन- युद्धविरामलाई लिएर अमेरिकी राष्ट्रपति डोनाल्ड ट्रम्पले नयाँ तर्क गरेका छन् ।

ट्रम्पले दुई साता लामो युद्धविरामपछि पत्रकारसँग बोल्दै चीनले इरानलाई वार्ताका लागि तयार पार्न महत्त्वपूर्ण भूमिका खेलेको बताएका छन्।

एक टेलिफोनिक अन्तर्वार्तामा उनलाई सोधिएको थियो, ‘के चीनले इरानलाई युद्धविरामका लागि प्रेरित गरेको हो ?’ यसमा उनले भने, ‘हो, मैले सुनेको छु।’

यद्यपि, यस विषयमा चिनियाँ विदेश मन्त्रालयको तर्फबाट अहिलेसम्म आधिकारिक प्रतिक्रिया आएको छैन।

वाशिङ्टनस्थित चिनियाँ दूतावासका प्रवक्ता लियु फेङ्ग्युले भने द्वन्द्व सुरु भएदेखि नै चीनले युद्धविराम र शान्तिका लागि प्रयास गरिरहेको बताएका छन्।

उनका अनुसार चीनले शान्तितर्फका सबै प्रयासलाई स्वागत गरेको छ। सबै पक्षले संवादमार्फत मतभेद अन्त्य गर्नुपर्नेमा जोड चीनले दिएको उनले बताए।

चीनले सम्बन्धित सबै पक्षले यो अवसर उपयोग गर्दै छिट्टै द्वन्द्व अन्त्य गर्ने आशा पनि व्यक्त गरेको छ।

चीनले यसअघि सन् २०२३ मा इरान र साउदी अरेबियाबीच सम्झौता गराउन पनि महत्त्वपूर्ण भूमिका खेलेको थियो।