काठमाडौँ– २०८२ सालमा नेपाली हलहरूमा स्वदेशीभन्दा विदेशी फिल्म बढी प्रदर्शनमा आएको पाइएको छ ।
चलचित्र विकास बोर्डकाअनुसार यो वर्ष ५६ नेपाली र ९३ वटा विदेशी फिल्म प्रदर्शनमा आएका हुन् । अर्थात्, २३ वटा बढी विदेशी फिल्म प्रदर्शनमा रहे ।
यो वर्ष ९४ वटा नेपाली फिल्मको सेन्सर गरिएको थियो । २३० वटा फिल्मले निर्माण इजाजत लिएका छन् ।
सर्वाधिक व्यापार गर्ने विदेशी फिल्म
नेपाली हलमा बढी भारतीय र हलिउड फिल्म प्रदर्शनमा आएको पाइन्छ । विदेशी फिल्महरू मध्येमा नेपाली बक्स अफिसमा भारतीय फिल्मको दबदबा रहेको भेटिएको छ ।
यो वर्ष सबैभन्दा बढी व्यापार गर्ने भारतीय फिल्म ‘धुरन्धर २’ हो । प्रदर्शनरत यस फिल्मको व्यापार १२ करोडमाथि छ ।
यसको पहिलो भाग ‘धुरन्धर’ले १० करोड १५ लाखकाे व्यापार गरेको पाइन्छ ।
अर्को १० करोड ग्रस कलेक्सन कटाउने फिलम ‘सैयारा’ हो । यसले १० करोड ५० लाख ग्रस कलेक्सन गरेको छ ।
१० करोड ग्रस कलेक्सन कटाउने फिल्महरू यी तीन मात्र हुन् ।
भारतीय फिल्मले सहज १० करोड व्यापार गरेको भने पाइदैन । सबैभन्दा बढी व्यापार गर्ने हलिउड फिल्म भने ‘अवतार : फायर एन्ड ऐश’ हो । यसकाले ६ करोड ६८ लाख ग्रस कलेक्सन गरेको छ ।
विदेशी फिल्म हाबी
यो वर्ष नेपाली चलचित्रहरूको कुल व्यापार १ अर्ब ८ करोड पुगेको बोर्डले जानकारी दिएको छ । यति व्यापारका लागि ३७ लाख ८१ हजार ५४४ वटा टिकट बिक्री भएको छ ।
तर, विदेशी फिल्म हेर्न ३३ लाख २२ हजार ७५७ वटा टिकट बिक्री भएको छ । बोर्डका अनुसार विदेशी फिल्म भन्दा स्वदेशी फिल्म हेर्न चार लाख ५८ हजार ७८७ वटा टिकट बढी बिक्री भएको छ ।
तर, कुल व्यापार भने विदेशी फिल्मकै छ । विदेशी फिल्मको कुल व्यापार १ अर्ब ११ करोड ५२ लाख छ । यो नेपाली फिल्मको कुल व्यापारभन्दा तीन करोड १४ लाखले बढी हो ।
अर्थात्, स्वदेशी फिल्मको टिकट बढी बिक्री भए पनि विदेशी फिल्मको व्यापार बढी भएको पाइन्छ । यो टिकटदर हेरफेर हुने नियमित प्रक्रियाले हो ।
साताको मध्यमा टिकटदर कम हुने भएकाले यस्तो भएको हो । तर, नेपाली बजारमा विदेशी फिल्मको वर्चश्व देखाउन यही तथ्याङ्क काफी छ ।
नेपाली फिल्मको अवस्था
एक नेपाली फिल्म औषतमा दुई करोडमा बन्ने गरेको पाइन्छ । ५३ वटा फिल्म १ अर्ब १२ करोड लगानीमा हलसम्म आइपुगेका हुन् ।
तर, कुल व्यापार १ अर्ब ८ करोड मात्रै छ । लगानी भन्दा चार करोड कम व्यापार भएको पाइन्छ । अझ अवस्था अनुसार व्यापारको ३०–४० प्रतिशत मात्रै निर्माताको भागमा आउँछ । विकास बोर्डको तथ्याङ्कले ठूलाे घाटामा नेपाली फिल्म क्षेत्र चलिरहको देखाउँछ ।
यति हुँदाहुँदै पनि नेपाली फिल्मलाई ग्रस कलेक्सनमा विदेशी फिल्मले जित्न भने पाएका छैनन् । अर्थात्, केही फिल्महरूले दर्शकबाट राम्रै साथ पाएका छन् ।
दीपक आचार्य ‘काकु’ द्वारा निर्देशित फिल्म ‘परान’ यो वर्ष सबैभन्दा बढी व्यापार गर्नेको सूचीमा छ । यसको व्यापार १७ करोड ७७ लाख छ ।
दोस्रो ‘आबाट आमा’ हो । यसले १३ करोड १३ लाख ग्रस कलेक्सन गरेको छ ।
तेस्रो ‘जेरी अन टप’, चौथो ‘ऊनको स्वीटर’ र पाँचौ ‘जारी २’ हो । यिनीहरूको व्यापार क्रमश: १२ करोड २८ लाख, ११ करोड ४१ लाख र ६ करोड २४ लाख छ ।
प्रतिक्रिया