काठमाडौं- पाकिस्तानमा मानव अधिकारवादी कानुन व्यवसायीलाई कारावासको सजाय सुनाइएकोप्रति अन्तर्राष्ट्रिय मानव अधिकारवादी संस्था एमनेष्टी इन्टरनेशनलले चिन्ता प्रकट गरेको छ ।

विज्ञप्ति जारी गर्दै एमनेष्टीले साइबरआतंकवाद र मिथ्या सूचना प्रवाह गरेको अभियोगमा इमान मजारी र हादी अली चट्टालाई १० वर्षको सजाय सुनाइएकोमा चिन्ता जनाएको हो ।

उनीहरुले सामाजिक सञ्जाल एक्समा पोष्ट गरेको सामग्रीका आधारमा अभियोग लगाइएको एमनेष्टीले उल्लेख गरेको छ । ती पोष्टमा उनीहरुले बलोच र पश्तुन अभियन्ताको समर्थन गरेको र पाकिस्तानी सेनाको आलोचना गरेको जनाइएको छ ।

उनीहरुलाई गत जनवरी २३ मा नियन्त्रणमा लिइएको थियो । उनीहरुलाई रावलपिण्डीको अदियाला जेलमा राखिएको छ ।

यी दुई जना चर्चित कानुन व्यवसायीले पाकिस्तानका धेरै नागरिकको अधिकार रक्षाको पहल गरेको एमनेष्टीले जनाएको छ । एमनेष्टीले उनीहरुलाई तत्काल रिहा गर्न समेत आह्वान गरेको छ ।