काठमाडौं- पाकिस्तानको बलोचिस्तानमा नागरिकलाई जबरजस्ती बेपत्ता पार्ने क्रम अझै रोकिएको छैन । हालैका दिनमा बलोचिस्तानमा थप ६ जनालाई बेपत्ता पारिएको छ ।

बलोचिस्तानको राजधानी क्वेट्टा र केच जिल्लाबाट उनीहरुलाई बेपत्ता पारिएको बलोचिस्तान पोस्टले जनाएको छ । हाल भ्वाइस फर मिसिङ बलोच पर्सन्स नामक अभियानले सञ्चालन गरिरहेको प्रदर्शन ६ हजार दिनभन्दा लामो समयदेखि जारी छ ।

पोस्टका अनुसार क्वेट्टाको किल्ली सोराब खान कम्ब्रानी क्षेत्रबाट प्रतिआतङ्कवाद विभाग र फ्रन्टियर कोरका सैनिकले चार जनालाई नियन्त्रणमा लिएका छन् । उनीहरुलाई अज्ञात स्थानमा लगिएको र उनीहरुको अवस्थाबारे कसैलाई जानकारी नदिइएको स्थानीयले जनाएका छन् ।

यसरी जबरजस्ती बेपत्ता पारिनेमा दाउद बलोच, उमर बलोच, नसीबुल्लाह र शहदाद खान नाम गरेका नाबालक छन् । उनीहरुका परिवारले सदस्यको अवस्थाबारे जानकारी नदिइएको जनाएका छन् ।

त्यस्तै, केच जिल्लाको गोबुर्द क्षेत्रमा पाकिस्तानी सुरक्षा बलले घर–घरमा छापा मारी सरवार र हाजिर नाम गरेका दुई दाजुभाइलाई नियन्त्रणमा लिएर अज्ञात स्थानतर्फ लगेको पोस्टले जनाएको छ ।