वासिङ्टन- अमेरिकी राष्ट्रपति डोनाल्ड ट्रम्पले ६० भन्दाबढी अन्तर्राष्ट्रिय संगठनबाट बाहिरिने निर्णय गरेका छन्।

यसमा संयुक्त राष्ट्रसंघसँग सम्बन्धित विभिन्न निकाय तथा भारत र फ्रान्सको नेतृत्वमा रहेको ‘इन्टरनेशनल सोलार एलायन्स’ पनि समावेश छन्।

बुधबार ट्रम्पले ‘अमेरिकाको हितविरुद्ध रहेका अन्तर्राष्ट्रिय संगठन, सन्धि र सम्झौताबाट बाहिरिने’सम्बन्धी कार्यकारी आदेशमा हस्ताक्षर गरेका हुन्।

ह्वाइट हाउसका अनुसार यी संस्थाहरू या त अनावश्यक छन् वा अमेरिकाको हितविरुद्ध काम गरिरहेका छन्।

जारी गरिएको तथ्यपत्रअनुसार सूचीमा ३१ संयुक्त राष्ट्रसंघसम्बद्ध संस्था र ३५ गैर–यूएन संस्था छन्, जसले अमेरिकाको राष्ट्रिय सुरक्षा, आर्थिक समृद्धि वा सार्वभौमिकताविरुद्ध काम गरिरहेको दाबी गरिएको छ।

ट्रम्पले सबै सरकारी विभाग र एजेन्सीलाई यस्ता संगठनबाट अमेरिका जतिसक्दो चाँडो बाहिरिने प्रक्रिया सुरु गर्न निर्देशन दिएका छन्।