काठमाडौं – नेकपा (माओवादी) का महासचिव नेत्रविक्रम चन्द ‘विप्लव’ले रोल्पा जिल्ला समितिलाई धन्यवाद दिएका छन् ।
आफूलाई प्रत्यक्ष निर्वाचनका लागि रोल्पाबाट सिफारिस गरेको भन्दै उनले जिल्ला समितिलाई धन्यवाद दिएका हुन् ।
उनले आफूमाथिको विश्वास, अपेक्षा र जिम्मेवारीप्रति धन्यवाद दिएका हुन् । उनले यो सिफारिसले आफूमाथि जिम्मेवारी थपिएको महसुस गरेको बताएका छन् ।

‘हाम्रो जनप्रिय पार्टी नेकपा (माओवादी) रोल्पा जिल्ला समितिले प्रतिनिधिसभा सदस्यका लागि हुने प्रत्यक्ष निर्वाचनका लागि मलाई सिफारिस गरेकोमा आभारसहित धन्यवाद ब्यक्त गर्दछु ।

कमरेडहरूले गरेको विश्वास, राखेको अपेक्षा र दिएको जिम्मेवारीलाई पेचिलो राजनीतिक परिस्थितिको गह्रौं कार्यभारका रूपमा बोध भएको छ’, विप्लवले फेसबुकमा लेखेका छन्, ‘सबै मित्र, अभिभावक, शुभचिन्तक, राजनीतिक दलसँग परामर्श लिदैं निर्णय कार्यान्वयनतर्फ बढिनेछ ।
धन्यवाद ।’