काठमाडौं– नेपालका लागि अमेरिकी कार्यवाहक राजदूत मेगन बोल्डिन र गृहमन्त्री सुदन गुरुङबीच भेटवार्ता भएको छ । सिंहदरबारस्थित गृह मन्त्रालयमा गृहमन्त्री गुरुङ र कार्यवाहक राजदूत बोल्डिनबीच बिहीबार अपराह्न भेटवार्ता भएको हो ।

भेटवार्ताका क्रममा विपद् व्यवस्थापनमा नेपाल-अमेरिका सहकार्य तथा हालै आएको विनाशकारी बाढीबाट प्रभावित नेपाली र अमेरिकी नागरिकहरूको खोज तथा पहिचानका विषयमा छलफल भएको दूतावासले जानकारी दिएको छ ।

छलफलका क्रममा अमेरिकाले नेपालको बाढी राहत तथा पुनर्स्थापनाका लागि ३ करोड ६० लाख अमेरिकी डलरभन्दा बढीको सहयोग उपलब्ध गराइरहेको जानकारी दिइएको छ ।

साथै, नेपालका उद्धारकर्मीहरूलाई सक्षम बनाउन अमेरिकी उपकरण, प्रविधि र विशेषज्ञता प्रदान गरी सहयोग भइरहेको र यस सहकार्यले प्रभावित समुदायलाई पुनरुत्थान गर्न मद्दत पुग्ने विश्वास व्यक्त गरिएको छ ।